ram

koī mast-e-bāda-o-jām hai koī mahv-e-raqs-o-ḳhirām hai

koī sarf-e-sher-o-kalām hai koī mahv-e-teġh-o-niyām hai

mujhe do na rang kī dāvateñ mire dil kī aañkh meñ raam hai

mujhe koī rog satā.e kyuuñ mujhe koī ranj rulā.e kyuuñ

mire dil ko aag jalā.e kyuuñ mirī ḳhaak charḳh uḌaa.e kyuuñ

mujhe ḳhauf-e-gard-e-alam nahīñ mire dil kī aañkh meñ raam hai

na hai aañkh ko koī justujū na hai qalb ko koī aarzū

na hai zauq-e-sair-e-bahār-jū na hai shauq-e-shohrat-e-kū-ba-kū

mirā dil dalīl-e-bahisht hai mire dil kī aañkh meñ raam hai

hai chaman ko ḳhvāhish-e-rañg-o-bū hai guhar ko ḳhvāhish-e-ābrū

hai ghaTā ko barq kī justujū hai havā ko saañs kī aarzū

mujhe aarzū hai na justujū mire dil kī aañkh meñ raam hai

na sharār-e-fisq-o-fujūr hai na havā-e-kibr-o-gurūr hai

na fareb hai na futūr hai mire ghar meñ nuur hī nuur hai

mire dil se pūchh na ham-nashīñ mire dil kī aañkh meñ raam hai

kahā phuul ne mujhe phuul kar mire āb-o-rang pe kar nazar

mirī aab āb-e-hayāt-asar mirā rang rañg-e-vafā-samar

mirī zau bahār-e-nigāh hai mirī bū bahār-e-mashām hai

kahā maiñ ne hañs ki ai be-ḳhabar na bahār-e-hāl pe naaz kar

tirī aab āb-e-sarāb-asar tirā rang rang-e-fanā-samar

mirī zindagī ko davām hai mire dil kī aañkh meñ raam hai

koi mast-e-baada-o-jam hai koi mahw-e-raqs-o-KHiram hai

koi sarf-e-sher-o-kalam hai koi mahw-e-tegh-o-niyam hai

mujhe do na rang ki dawaten mere dil ki aankh mein ram hai

mujhe koi rog satae kyun mujhe koi ranj rulae kyun

mere dil ko aag jalae kyun meri KHak charKH uDae kyun

mujhe KHauf-e-gard-e-alam nahin mere dil ki aankh mein ram hai

na hai aankh ko koi justuju na hai qalb ko koi aarzu

na hai zauq-e-sair-e-bahaar-ju na hai shauq-e-shohrat-e-ku-ba-ku

mera dil dalil-e-bahisht hai mere dil ki aankh mein ram hai

hai chaman ko KHwahish-e-rang-o-bu hai guhar ko KHwahish-e-abru

hai ghaTa ko barq ki justuju hai hawa ko sans ki aarzu

mujhe aarzu hai na justuju mere dil ki aankh mein ram hai

na sharar-e-fisq-o-fujur hai na hawa-e-kibr-o-gurur hai

na fareb hai na futur hai mere ghar mein nur hi nur hai

mere dil se puchh na ham-nashin mere dil ki aankh mein ram hai

kaha phul ne mujhe phul kar mere aab-o-rang pe kar nazar

meri aab aab-e-hayat-asar mera rang rang-e-wafa-samar

meri zau bahaar-e-nigah hai meri bu bahaar-e-masham hai

kaha main ne hans ki ai be-KHabar na bahaar-e-haal pe naz kar

teri aab aab-e-sarab-asar tera rang rang-e-fana-samar

meri zindagi ko dawam hai mere dil ki aankh mein ram hai