raat

raat kitnī sāhir hai

gard se aTe chehre

baḌh ke thaam letī hai

apne narm hāthoñ meñ

din kā shor kānoñ se

phīke manzar āñkhoñ se

chun ke pheñk detī hai

be-karāñ añdheroñ meñ

muzmahil thake-māñde

laḌkhaḌāte jismoñ ko

baḌh ke thaam letī hai

raat apnī bāñhoñ meñ

raat kitnī māhir hai

jabr aur mashaqqat kī

saḳhtiyāñ bhulāne meñ

dostī nibhāne meñ

be-sukūn zehnoñ ko

loriyāñ sunāne meñ

jāgne sulāne meñ

raat kitnī māhir hai

raat kitnī behis hai

us kī āstīnoñ meñ

kitne saañp palte haiñ

tā-sahar gunāhoñ ke

kaise daur chalte haiñ

raat jaise gūñgī hai

dekhtī hai saarā kuchh

aur kuchh nahīñ kahtī

raat jaise bahrī hai

siskiyāñ nahīñ suntī

hausla nahīñ detī

jin kī kashtiyoñ ko ġham

zabt ke jazīre par

Therne nahīñ detā

jin ko bār-e-bad-baḳhtī

ziist ke samundar meñ

tairne nahīñ detā

reg-e-sāhil-e-shab par

kaise sar paTaḳhte haiñ

raat jaise andhī hai

aasrā nahīñ detī

dost hī nahīñ bantī

raat kitnī behis hai

raat kitni sahir hai

gard se aTe chehre

baDh ke tham leti hai

apne narm hathon mein

din ka shor kanon se

phike manzar aankhon se

chun ke phenk deti hai

be-karan andheron mein

muzmahil thake-mande

laDkhaDate jismon ko

baDh ke tham leti hai

raat apni banhon mein

raat kitni mahir hai

jabr aur mashaqqat ki

saKHtiyan bhulane mein

dosti nibhane mein

be-sukun zehnon ko

loriyan sunane mein

jagne sulane mein

raat kitni mahir hai

raat kitni behis hai

us ki aastinon mein

kitne sanp palte hain

ta-sahar gunahon ke

kaise daur chalte hain

raat jaise gungi hai

dekhti hai sara kuchh

aur kuchh nahin kahti

raat jaise bahri hai

siskiyan nahin sunti

hausla nahin deti

jin ki kashtiyon ko gham

zabt ke jazire par

Therne nahin deta

jin ko bar-e-bad-baKHti

zist ke samundar mein

tairne nahin deta

reg-e-sahil-e-shab par

kaise sar paTaKHte hain

raat jaise andhi hai

aasra nahin deti

dost hi nahin banti

raat kitni behis hai