raat ke bara baje

raat ke koī baara baje hoñge

garmī hai

saḌkoñ pe koī nahīñ

būḌhā darvesh bhī jā chukā hai

us jozāmī bhikāran kī gaaḌī

bhī nazroñ se ojhal hai

rāsta saaf hai

hoTaloñ se nikaltī huī laḌkiyāñ haiñ

na laḌkoñ ke jhurmuT

muñDeroñ par

dil meñ

na dil kā dhḌaknā

na bhūkī nigāheñ

na siiTī

qumqume

gardaneñ taane

chashm-bar-rāh haiñ

koī guzre to gul ho ke

un kā tamāshā kareñ

sarakte sarakte

vo fōtpath se

koī chakkar kī hariyālī par aa jame haiñ

chāñd niklā

to chāroñ ne chillāyā

(sāñp ke muñh se niklā huā jaise piilā chhachhūñdar)

lo chāñd niklā

vo chāñd tanhā hai

ik dard sab ke diloñ meñ pighalne lagā

un kī nazroñ ne bose liye chāñd ke

chāñd kī piiTh ko thapthapāyā

baḌe zor se

josh o mastī ke aalam meñ

shīshe meñ jitnī bachī thī

vo sab baañT kar

qahqahe maar ke

pī ga.e

aur gale mil ke

ik dūsre ko bahut duur tak

chūmte bhī rahe

nāchte nāchte

chāroñ rone lage

har ek ke muñh se niklā

yāro!

maañ yaad aatī hai, jaatā huuñ

maiñ ne taurāt o injīl o qur.ān meñ

yarmiya hājara aur yāqūb

ke karb kī dāstāneñ paḌhī haiñ

un kā ronā sunā hai

aur royā bhī huuñ

aaj bhī ro rahā huuñ

raat ke koi bara baje honge

garmi hai

saDkon pe koi nahin

buDha darwesh bhi ja chuka hai

us jozami bhikaran ki gaDi

bhi nazron se ojhal hai

rasta saf hai

hoTalon se nikalti hui laDkiyan hain

na laDkon ke jhurmuT

munDeron par

dil mein

na dil ka dhDakna

na bhuki nigahen

na siTi

qumqume

gardanen tane

chashm-bar-rah hain

koi guzre to gul ho ke

un ka tamasha karen

sarakte sarakte

wo footpath se

koi chakkar ki hariyali par aa jame hain

chand nikla

to chaaron ne chillaya

(sanp ke munh se nikla hua jaise pila chhachhundar)

lo chand nikla

wo chand tanha hai

ek dard sab ke dilon mein pighalne laga

un ki nazron ne bose liye chand ke

chand ki piTh ko thapthapaya

baDe zor se

josh o masti ke aalam mein

shishe mein jitni bachi thi

wo sab banT kar

qahqahe mar ke

pi gae

aur gale mil ke

ek dusre ko bahut dur tak

chumte bhi rahe

nachte nachte

chaaron rone lage

har ek ke munh se nikla

yaro!

man yaad aati hai, jata hun

main ne tauraat o injil o quran mein

yarmiya hajara aur yaqub

ke karb ki dastanen paDhi hain

un ka rona suna hai

aur roya bhi hun

aaj bhi ro raha hun