raat ke paDaw par

raat ne apnī mehrbān bāheñ phailā diiñ

aur siskiyoñ kā javār bhāTā tārīkiyoñ se lipaT gayā

tasvīroñ ko pahchānñe vaale diloñ ke dīpak bujhte ga.e

aur un saarī anjān tasvīroñ ke darmiyān

hairān āñkheñ haiñ

aur siskiyoñ kā javār bhāTā

siskiyāñ jinheñ zindagī ke tavīl dinoñ ne panāh na dī

aur kirnoñ par bhāgte hue

kisī ne nahīñ sochā

nasheb meñ ghāTiyoñ ke darmiyān raat Thahartī hai

kam aql musāfir qadmoñ kī samajh meñ na aayā

ki zindagī charindoñ aur hadd-e-nigāh tak phailī ghaas kā muāhida nahīñ hai

āvāz kī samteñ muta.ayyan ho ga.iiñ

aur taqlīd ke aaseb lafzoñ ke pāk-dāman sayyāroñ ko rauñdte chale ga.e

anthak mehnatoñ kī samajh meñ kuchh na aayā

yahāñ tak ki soch kī sunahrī raushaniyāñ thak kar gir paḌeñ

nasheb aur nasheb kī jānib

junūn kā nasheb

jahāñ raat Thahartī hai

aur pur-asrāriyat kā sāneha

jahāñ sarāboñ ke asrār khul ga.e

aur jahāñ musāfir qadmoñ aur anthak mehnatoñ aur siskiyoñ ke javār bhāTā kī dostī hai

ye raat kā paḌāv hai jahāñ

āñkhoñ kī tamām an-ginat saḌkeñ

ḳhudā hāfiz kī bhuul bhulayyoñ meñ gum ho jaatī haiñ

raat ne apni mehrban bahen phaila din

aur siskiyon ka jawar bhaTa tarikiyon se lipaT gaya

taswiron ko pahchanne wale dilon ke dipak bujhte gae

aur un sari anjaan taswiron ke darmiyan

hairan aankhen hain

aur siskiyon ka jawar bhaTa

siskiyan jinhen zindagi ke tawil dinon ne panah na di

aur kirnon par bhagte hue

kisi ne nahin socha

nasheb mein ghaTiyon ke darmiyan raat Thaharti hai

kam aql musafir qadmon ki samajh mein na aaya

ki zindagi charindon aur hadd-e-nigah tak phaili ghas ka muahida nahin hai

aawaz ki samten mutayyan ho gain

aur taqlid ke aaseb lafzon ke pak-daman sayyaron ko raundte chale gae

anthak mehnaton ki samajh mein kuchh na aaya

yahan tak ki soch ki sunahri raushaniyan thak kar gir paDen

nasheb aur nasheb ki jaanib

junun ka nasheb

jahan raat Thaharti hai

aur pur-asrariyat ka saneha

jahan sarabon ke asrar khul gae

aur jahan musafir qadmon aur anthak mehnaton aur siskiyon ke jawar bhaTa ki dosti hai

ye raat ka paDaw hai jahan

aankhon ki tamam an-ginat saDken

KHuda hafiz ki bhul bhulayyon mein gum ho jati hain