raaten sachchi hain din jhuTe hain

chāhe tum merī bīnā.ī khurach Daalo phir bhī apne ḳhvāb nahīñ chhoḌūñgā

un kī lazzat aur aziyyat se maiñ apnā koī ahd nahīñ toḌūñgā

tez nazar nā-bīnāoñ kī ābādī meñ

kyā maiñ apne dhyān kī ye pūñjī bhī ginvā duuñ

haañ mere ḳhvāboñ ko tumhārī sub.hoñ kī sard aur sāya-gūñ tābīroñ se nafrat hai

in sub.hoñ ne shaam ke hāthoñ ab tak jitne sūraj beche

vo sab ik barfānī bhaap kī chamkīlī aur chakkar khātī golā.ī the

so mere ḳhvāboñ kī rāteñ jaltī aur dahaktī rāteñ

aisī yaḳh-basta tābīroñ ke har din se achchhī haiñ aur sachchī bhī haiñ

jis meñ dhundlā chakkar khātā chamkīlā-pan chhe atrāf kā rog banā hai

mere andhere bhī sachche haiñ

aur tumhāre ''rog ujāle'' bhī jhūTe haiñ

rāteñ sachchī haiñ din jhūTe

jab tak din jhūTe haiñ jab tak

rāteñ sahnā aur apne ḳhvāboñ meñ rahnā

ḳhvāboñ ko bahkāne vaale din ke ujāloñ se achchhā hai

haañ maiñ bahkāoñ kī dhund nahīñ oḌhūñgā

chāhe tum merī bīnā.ī khurach Daalo maiñ phir bhī apne ḳhvāb nahīñ chhoḌūñgā

apnā ahd nahīñ toḌūñgā

yahī to bas merā sab kuchh hai

maah o saal ke ġhārat-gar se merī Thanī hai

merī jaan par aan banī hai

chāhe kuchh ho mere āḳhirī saañs talak ab chāhe kuchh ho

chahe tum meri binai khurach Dalo phir bhi apne KHwab nahin chhoDunga

un ki lazzat aur aziyyat se main apna koi ahd nahin toDunga

tez nazar na-binaon ki aabaadi mein

kya main apne dhyan ki ye punji bhi ginwa dun

han mere KHwabon ko tumhaari subhon ki sard aur saya-gun tabiron se nafrat hai

in subhon ne sham ke hathon ab tak jitne suraj beche

wo sab ek barfani bhap ki chamkili aur chakkar khati golai the

so mere KHwabon ki raaten jalti aur dahakti raaten

aisi yaKH-basta tabiron ke har din se achchhi hain aur sachchi bhi hain

jis mein dhundla chakkar khata chamkila-pan chhe atraf ka rog bana hai

mere andhere bhi sachche hain

aur tumhaare rog ujale bhi jhuTe hain

raaten sachchi hain din jhuTe

jab tak din jhuTe hain jab tak

raaten sahna aur apne KHwabon mein rahna

KHwabon ko bahkane wale din ke ujalon se achchha hai

han main bahkaon ki dhund nahin oDhunga

chahe tum meri binai khurach Dalo main phir bhi apne KHwab nahin chhoDunga

apna ahd nahin toDunga

yahi to bas mera sab kuchh hai

mah o sal ke ghaarat-gar se meri Thani hai

meri jaan par aan bani hai

chahe kuchh ho mere aaKHiri sans talak ab chahe kuchh ho