raaton ko

āñkhoñ meñ koī bas jaatā hai

mīThī sī hañsī hans jaatā hai

ehsās kī lahreñ un tārīk jazīroñ se Takrātī haiñ

jahāñ naġhme pañkh sañvārte haiñ

sangīn fasīloñ ke gumbad se pahre-dār pukārte haiñ

kyā kartā hai

dil Dartā hai

dil Dartā hai in kaalī akelī rātoñ se dil Dartā hai

in suunī tanhā rātoñ meñ

dil Duub ke guzrī bātoñ meñ

jab sochtā hai kyā dekhtā hai har samt dhueñ kā

bādal hai vādī-o-bayābāñ jal-thal hai

zaḳhḳhār samundar sūkhe haiñ pur-haul chaTāneñ pighlī haiñ

dhartī ne TūTte tāroñ kī jaltī huī lāsheñ niglī haiñ

pehnā-e-zamāñ ke siine par ik mauj añgḌā.ī letī hai

is āb-o-gil kī daldal meñ ik chaap sunā.ī detī hai

ik thirkan sī ik dhaḌkan sī āfāq kī Dhalvānoñ meñ kahīñ

tāneñ jo humak kar miltī haiñ chal paḌtī haiñ ruktī hī nahīñ

in rāgniyoñ ke bhañvar bhañvar meñ sad.hā sadiyoñ ghuum ga.iiñ

in qarn-ālūd masāfat meñ laakh aable phūTe diip bujhe

aur aaj kise mālūm zamīr-e-hastī kā āhañg-e-tapāñ

kis duur ke des ke kuhroñ meñ larzāñ larzāñ raqsāñ raqsāñ

is saañs kī rau tak pahuñchā hai

is merī mez kī jaltī huī qindīl kī lau tak pahuñchā hai

kaun aayā hai kaun aatā hai kaun aa.egā

an-jāne man kī mūrakhtā ko kyā kyā dhyān guzartā hai

dil Dartā hai

dil Dartā hai un kaalī akelī rātoñ se dil Dartā hai

aankhon mein koi bas jata hai

miThi si hansi hans jata hai

ehsas ki lahren un tarik jaziron se Takraati hain

jahan naghme pankh sanwarte hain

sangin fasilon ke gumbad se pahre-dar pukarte hain

kya karta hai

dil Darta hai

dil Darta hai in kali akeli raaton se dil Darta hai

in suni tanha raaton mein

dil Dub ke guzri baaton mein

jab sochta hai kya dekhta hai har samt dhuen ka

baadal hai wadi-o-bayaban jal-thal hai

zaKHKHar samundar sukhe hain pur-haul chaTanen pighli hain

dharti ne TuTte taron ki jalti hui lashen nigli hain

pehna-e-zaman ke sine par ek mauj angDai leti hai

is aab-o-gil ki daldal mein ek chap sunai deti hai

ek thirkan si ek dhaDkan si aafaq ki Dhalwanon mein kahin

tanen jo humak kar milti hain chal paDti hain rukti hi nahin

in ragniyon ke bhanwar bhanwar mein sadha sadiyon ghum gain

in qarn-alud masafat mein lakh aable phuTe dip bujhe

aur aaj kise malum zamir-e-hasti ka aahang-e-tapan

kis dur ke des ke kuhron mein larzan larzan raqsan raqsan

is sans ki rau tak pahuncha hai

is meri mez ki jalti hui qindil ki lau tak pahuncha hai

kaun aaya hai kaun aata hai kaun aaega

an-jaane man ki murakhta ko kya kya dhyan guzarta hai

dil Darta hai

dil Darta hai un kali akeli raaton se dil Darta hai