radd-e-amal

mujhe ye yaqīñ thā

ki jab maiñ sunā.ūñgā

is shahr ko

shab ke pahlū meñ kis tarah paayā hai maiñ ne

to sab log mere qarīb aa ke

hairat se mujh ko takeñge

bharī piyāliyāñ chaa.e kī

haath se chhūT kar gir paḌeñgī

nigāhoñ meñ

gahrī udāsī ke bādal umaDne lageñge

na.e muāshare kī

bad-a.amāliyoñ aur bad-chalniyoñ par

baḌe saḳht lahje meñ tanqīd hogī

magar koī pyālī na hāthoñ se chhūTī

na gahrī udāsī nigāhoñ meñ umDī

na.e ma.āshre kī

bad-a.amāliyoñ aur bad-chalniyoñ par

kisī ne na sañg-e-malāmat hī pheñkā

sunā sirf itnā

abhī tum ko is shahr ke jānñe meñ ka.ī din lageñge

mujhe ye yaqin tha

ki jab main sunaunga

is shahr ko

shab ke pahlu mein kis tarah paya hai main ne

to sab log mere qarib aa ke

hairat se mujh ko takenge

bhari piyaliyan chae ki

hath se chhuT kar gir paDengi

nigahon mein

gahri udasi ke baadal umaDne lagenge

nae muashare ki

bad-amaliyon aur bad-chalniyon par

baDe saKHt lahje mein tanqid hogi

magar koi pyali na hathon se chhuTi

na gahri udasi nigahon mein umDi

nae maashre ki

bad-amaliyon aur bad-chalniyon par

kisi ne na sang-e-malamat hi phenka

suna sirf itna

abhi tum ko is shahr ke jaanne mein kai din lagenge