radd-e-tashkil

ḳhudā.ī mere bātin meñ

utartī sard shāmoñ ko

kisī ta.abīr ke marqad pe

ik din chhoḌ aa.egī

mire ash.ār kī takrār se aajiz

mere alfāz ke TukḌoñ se apnī

āhanī dīvār aur shajre sajā.egī

ḳhudā.ī

mujh se mujh ko chhīn kar

apnā banāne kī tamannā meñ

mire hāthoñ se merī uñgliyāñ

kāTegī mehnat se

aur us par fikr kā kalima sunā.egī

ḳhudā.ī jāntī hai

gardanoñ par vaar karnā jurm hai

so ye

mirī āñkhoñ meñ

apnī putliyāñ bharne kī koshish meñ

adhūre tajraboñ ko āzmā.egī

mire pairoñ tale se

chhīn legī farsh merā aur

mujhe qālīn par chalnā sikhā.egī

ḳhudā.ī mere kāñdhoñ par

safar tabrīk kā tai kartī jā.egī

tasavvur ke makānoñ meñ

mire kirdār kā ik but banā.egī

khulī āñkhoñ samā.at se lade kānoñ

fasāhat se bhare hoñToñ kā

ik ḳhāmosh but

jise chhūnā man.a hogā

KHudai mere baatin mein

utarti sard shamon ko

kisi tabir ke marqad pe

ek din chhoD aaegi

mere ashaar ki takrar se aajiz

mere alfaz ke TukDon se apni

aahani diwar aur shajre sajaegi

KHudai

mujh se mujh ko chhin kar

apna banane ki tamanna mein

mere hathon se meri ungliyan

kaTegi mehnat se

aur us par fikr ka kalima sunaegi

KHudai jaanti hai

gardanon par war karna jurm hai

so ye

meri aankhon mein

apni putliyan bharne ki koshish mein

adhure tajrabon ko aazmaegi

mere pairon tale se

chhin legi farsh mera aur

mujhe qalin par chalna sikhaegi

KHudai mere kandhon par

safar tabrik ka tai karti jaegi

tasawwur ke makanon mein

mere kirdar ka ek but banaegi

khuli aankhon samaat se lade kanon

fasahat se bhare honTon ka

ek KHamosh but

jise chhuna mana hoga