raftagan

haiñ yād-hā-e-rafta ke dīvār-o-dar kahāñ

vo sañg-e-āstāñ kahāñ vo rahguzar kahāñ

dasht-e-vafā meñ dāvat-e-dīvāngī kise

majbūr ġham ko ruḳhsat-e-āh-e-sahar kahāñ

un rāstoñ meñ DhūñDte phirte haiñ naqsh-e-pā

ai ham-rahān-e-tāza vo ahl-e-safar kahāñ

hai kaun jis ko nazr kareñ āñsuoñ ke phuul

le jaa.eñ aaj ābrū-e-chashm-e-tar kahāñ

har ajnabī se pūchh rahe haiñ nishān-e-rāh

nau-vāridān-e-shahr ko ghar kī ḳhabar kahāñ

dar dar kī ḳhaak chhānte ye din to kaT gayā

ab fikr-e-shab hai dekhiye hogī basar kahāñ

hain yaad-ha-e-rafta ke diwar-o-dar kahan

wo sang-e-astan kahan wo rahguzar kahan

dasht-e-wafa mein dawat-e-diwangi kise

majbur gham ko ruKHsat-e-ah-e-sahar kahan

un raston mein DhunDte phirte hain naqsh-e-pa

ai ham-rahan-e-taza wo ahl-e-safar kahan

hai kaun jis ko nazr karen aansuon ke phul

le jaen aaj aabru-e-chashm-e-tar kahan

har ajnabi se puchh rahe hain nishan-e-rah

nau-waridan-e-shahr ko ghar ki KHabar kahan

dar dar ki KHak chhante ye din to kaT gaya

ab fikr-e-shab hai dekhiye hogi basar kahan