rang-birangi ek chunariya

jab se abbā ke chehre ko

lakvā maar gayā thā

aur daadā ko dil kā daura

ziyāda-tar vo ghar ke andar rahte

aapas hī meñ bāteñ karte

vaqt bitāte

bāhar ke sab kaam baḌe bhayyā kī zimmedārī

baaġh baġhīche court kacherī aur paTvārī

fasl ugāte haarī

apne ghar ke mardāne kā haal burā thā

har kamre meñ kaaTh kabāḌ makḌī jaale

kis ko fursat kaun use ab dekhe-bhāle

lekin ik kamre ke dar par

jab dekho ik qufl paḌā hai

darvāza bhī ḳhuub baḌā hai

ik din maiñ ne pūchh liyā phir

āḳhir is ke andar kyā hai

maañ hoñToñ par uñglī rakh kar bolī

shas shas shas

abbā ne bhī raah dikhā.ī

jaao beTā jā kar khelo

maiñ ne pair paTaḳh kar pūchhā

āḳhir kyā hai is kamre ke andar

hiire motī chāñdī sonā

yā phir koī aur khilaunā

āḳhir kyā hai is kamre ke andar

daadā ne huñkārā bhar kar

dhuñdle shīshoñ kī ainak se ghuur ke dekhā

abbā ne phir DaañT pilā.ī

bhayyā aur baajī ne baazū pakḌe mujh ko mere kamre meñ lā paTḳhā

ik din bhayyā

shor-o-ġhul kī āvāzoñ ko saath liye

kuchh ḳhaufzada se ghabrā.e se ghar meñ aa kar

apne kamre meñ ghus baiThe

shor-o-ġhul ke saath hī

abbā ke aur dādā-jī ke nāmoñ kī takrār duhā.ī

saath meñ fariyādī kī chīḳheñ

jis ne vo ik baat batā dī

jis ko bhayyā sharm aur ḳhauf ke maare

apne muñh se kuchh din aur na kahte

aisā manzar pahle bhī ham dekh chuke the

lekin abbā aur daadā ke ġhusse

māl-o-daulat kī barsāt ke hāthoñ

fariyādī kī chīḳheñ bāhar bāhar dafn ho jātīñ

lekin is din fariyādī kī chīḳheñ

laal havelī kī dīvāreñ toḌ ke andar tak aa pahuñchī thiiñ

shor-sharāba sun kar be-zārī se

abbā ne daadā ko dekhā

baisākhī par bojh ko laadā

dādā-jī dil pakḌe pakḌe

ulTe qadmoñ abbā ke qadmoñ par chalte

aag ugaltī āñkheñ le kar mardāne hisse meñ pahuñche

maiñ bhī chhuptā-chhupātā saath thā un ke pīchhe pīchhe

qufl-zada kamre tak pahuñchā

kamra bhī us roz khulā thā

lekin un ko hosh kahāñ thā

kuchh hī der meñ baap aur beTā

abbā aur daadā abbā

pathrīle chehroñ ke uupar lutf-o-karam kā ḳhol chaḌhā thā

hoñToñ par muskān sajā.e

amn kī devī kā dīdār karātī āñkhoñ ko hamrāh liye

kamre se nikle

maiñ jo kāTh-kabāḌ ke pīchhe

chhup baiThā thā

betābī se ḳhālī kamre meñ jā pahuñchā

andar maiñ ne jo kuchh dekhā

dekh ke us ko merī āñkheñ sadme aur hairat se

apne halqoñ se bāhar thiiñ

farsh ke uupar be-Dhakkanoñ ke tiin baḌe sandūq rakhe the

sandūqoñ par daadā abbā aur bhayyā ke naam likhe the

phaTī-purānī oḌhniyoñ se daadā aur abbā ke

donoñ hī sandūq bhare the

bhayyā ke sandūq se aTkī rang-birangī ek chunariyā

farsh tale fariyād-kunāñ thī

daadā abbā aur abbā se

yā phir us se jo

apnā hai ġhair nahīñ

insāf meñ jis ke der nahīñ andher nahīñ

har-sū hāhā-kār machā thā

bāhar saarā gaañv jam.a thā

jab se abba ke chehre ko

lakwa mar gaya tha

aur dada ko dil ka daura

ziyaada-tar wo ghar ke andar rahte

aapas hi mein baaten karte

waqt bitate

bahar ke sab kaam baDe bhayya ki zimmedari

bagh baghiche court kacheri aur paTwari

fasl ugate haari

apne ghar ke mardane ka haal bura tha

har kamre mein kaTh kabaD makDi jale

kis ko fursat kaun use ab dekhe-bhaale

lekin ek kamre ke dar par

jab dekho ek qufl paDa hai

darwaza bhi KHub baDa hai

ek din main ne puchh liya phir

aaKHir is ke andar kya hai

man honTon par ungli rakh kar boli

shas shas shas

abba ne bhi rah dikhai

jao beTa ja kar khelo

main ne pair paTaKH kar puchha

aaKHir kya hai is kamre ke andar

hire moti chandi sona

ya phir koi aur khilauna

aaKHir kya hai is kamre ke andar

dada ne hunkara bhar kar

dhundle shishon ki ainak se ghur ke dekha

abba ne phir DanT pilai

bhayya aur baji ne bazu pakDe mujh ko mere kamre mein la paTKHa

ek din bhayya

shor-o-ghul ki aawazon ko sath liye

kuchh KHaufzada se ghabrae se ghar mein aa kar

apne kamre mein ghus baiThe

shor-o-ghul ke sath hi

abba ke aur dada-ji ke namon ki takrar duhai

sath mein fariyaadi ki chiKHen

jis ne wo ek baat bata di

jis ko bhayya sharm aur KHauf ke mare

apne munh se kuchh din aur na kahte

aisa manzar pahle bhi hum dekh chuke the

lekin abba aur dada ke ghusse

mal-o-daulat ki barsat ke hathon

fariyaadi ki chiKHen bahar bahar dafn ho jatin

lekin is din fariyaadi ki chiKHen

lal haweli ki diwaren toD ke andar tak aa pahunchi thin

shor-sharaba sun kar be-zari se

abba ne dada ko dekha

baisakhi par bojh ko lada

dada-ji dil pakDe pakDe

ulTe qadmon abba ke qadmon par chalte

aag ugalti aankhen le kar mardane hisse mein pahunche

main bhi chhupta-chhupata sath tha un ke pichhe pichhe

qufl-zada kamre tak pahuncha

kamra bhi us roz khula tha

lekin un ko hosh kahan tha

kuchh hi der mein bap aur beTa

abba aur dada abba

pathrile chehron ke upar lutf-o-karam ka KHol chaDha tha

honTon par muskan sajae

amn ki dewi ka didar karaati aankhon ko hamrah liye

kamre se nikle

main jo kaTh-kabaD ke pichhe

chhup baiTha tha

betabi se KHali kamre mein ja pahuncha

andar main ne jo kuchh dekha

dekh ke us ko meri aankhen sadme aur hairat se

apne halqon se bahar thin

farsh ke upar be-Dhakkanon ke tin baDe sanduq rakhe the

sanduqon par dada abba aur bhayya ke nam likhe the

phaTi-purani oDhniyon se dada aur abba ke

donon hi sanduq bhare the

bhayya ke sanduq se aTki rang-birangi ek chunariya

farsh tale fariyaad-kunan thi

dada abba aur abba se

ya phir us se jo

apna hai ghair nahin

insaf mein jis ke der nahin andher nahin

har-su haha-kar macha tha

bahar sara ganw jama tha