rang

laḌkī

tasvīreñ banātī hai

safed kāġhaz par

idhar se udhar ko

bahut saarī lakīreñ Dāltī hai

in meñ koī bhī lakīreñ

ek dūsre ko chhū kar nahīñ guzartī

shahr se bāhar jaane vaalī saḌkoñ kī tarah

sab lakīreñ

kisī na.ī jagah pahuñchā detī haiñ

ham vahāñ se vāpas nahīñ aa sakte

lakīr ke āḳhirī sire par

hameñ Thahrā dekh ke

laḌkī pareshān ho jaatī hai

vo ā.īvarī paper par

bahut se nuqte Dāltī hai

aur phir surḳh pencil se

inhīñ lakīroñ se milāne lagtī hai

thoḌī hī der meñ

ek nayā barr-e-āzam numūdār ho jaatā hai

laḌkī lakīr ke sire par

Thahre hue aadmī ko

apne barr-e-āzam ke ek jazīre par le jā kar

chhoḌ detī hai

is jazīre par abhī shāyad

bahut ziyāda bādal

bahut ziyāda āsmān

bahut ziyāda ḳhāmoshī

aur bahut ziyāda tanhā.ī hai

itnī saarī chīzoñ ke

zarūrat se ziyāda hone par

aadmī Dar jaatā hai aur

rone lagtā hai

vo kahtā hai mujhe ek shahr chāhiye

laḌkī va.ada kartī aur use

apnī banā.ī huī bahut sī tasvīreñ dikhātī hai

jin meñ dariyā samundar jañgal aur shahr

hamesha maujūd rahte haiñ

vo ek shahr ko apne paas rakh letā hai

laḌkī ek aur shahr banātī hai

us shahr meñ abhī koī nahīñ rahtā

bahut ziyāda ḳhālī ghar

bahut ziyāda ḳhālī rāste

bahut ziyāda ḳhālī āsmān

laḌkī apne shahr ko dekhtī hai

aur ḳhāmosh ho jaatī hai

vo ro nahīñ saktī

use ḳhāmosh baiThā dekh ke

aadmī rañgīn pencileñ uThā kar

bahut ziyāda ḳhālī shahr meñ

rañg bharne lagtā hai

laDki

taswiren banati hai

safed kaghaz par

idhar se udhar ko

bahut sari lakiren Dalti hai

in mein koi bhi lakiren

ek dusre ko chhu kar nahin guzarti

shahr se bahar jaane wali saDkon ki tarah

sab lakiren

kisi nai jagah pahuncha deti hain

hum wahan se wapas nahin aa sakte

lakir ke aaKHiri sire par

hamein Thahra dekh ke

laDki pareshan ho jati hai

wo aaiwari paper par

bahut se nuqte Dalti hai

aur phir surKH pencil se

inhin lakiron se milane lagti hai

thoDi hi der mein

ek naya barr-e-azam numudar ho jata hai

laDki lakir ke sire par

Thahre hue aadmi ko

apne barr-e-azam ke ek jazire par le ja kar

chhoD deti hai

is jazire par abhi shayad

bahut ziyaada baadal

bahut ziyaada aasman

bahut ziyaada KHamoshi

aur bahut ziyaada tanhai hai

itni sari chizon ke

zarurat se ziyaada hone par

aadmi Dar jata hai aur

rone lagta hai

wo kahta hai mujhe ek shahr chahiye

laDki wada karti aur use

apni banai hui bahut si taswiren dikhati hai

jin mein dariya samundar jangal aur shahr

hamesha maujud rahte hain

wo ek shahr ko apne pas rakh leta hai

laDki ek aur shahr banati hai

us shahr mein abhi koi nahin rahta

bahut ziyaada KHali ghar

bahut ziyaada KHali raste

bahut ziyaada KHali aasman

laDki apne shahr ko dekhti hai

aur KHamosh ho jati hai

wo ro nahin sakti

use KHamosh baiTha dekh ke

aadmi rangin pencilen uTha kar

bahut ziyaada KHali shahr mein

rang bharne lagta hai