rangin wadi

ufuq ke us taraf kahte haiñ ik rañgīn vaadī hai

vahāñ rañgīniyāñ kohsār ke dāman meñ sotī haiñ

guloñ kī nik.hateñ har chār-sū āvāra hotī haiñ

vahāñ naġhme sabā kī narm-rau maujoñ meñ bahte haiñ

vahāñ āb-e-ravāñ meñ mastiyoñ ke raqs rahte haiñ

vahāñ hai ek duniya-e-tarannum ābshāroñ meñ

vahāñ taqsīm hotā hai tabassum lāla-zāroñ meñ

sunahrī chāñd kī kirneñ vahāñ rātoñ ko aatī haiñ

vahāñ pariyāñ mohabbat ke ḳhudā ke giit gaatī haiñ

kanār-e-āb-e-husn-o-ishq bāham sair karte haiñ

ga.ī-guzrī ġhalat-fahmī kā zikr-e-ḳhair karte haiñ

vahāñ ke rahne vāloñ ko gunah karnā nahīñ aatā

zalīl o mubtazil jazbāt se Darnā nahīñ aatā

vahāñ ahl-e-mohabbat kā na koī naam dhartā hai

vahāñ ahl-e-mohabbat par na koī rashk kartā hai

mohabbat karne vāloñ ko vahāñ rusvā nahīñ karte

mohabbat karne vāloñ kā vahāñ charchā nahīñ karte

ham aksar sochte haiñ tañg aa kar kahīñ chal deñ

mirī jaañ! ai mire ḳhvāboñ kī duniyā chal vahīñ chal deñ

ufuq ke us taraf kahte haiñ ik rañgīn vaadī hai

ufuq ke us taraf kahte hain ek rangin wadi hai

wahan ranginiyan kohsar ke daman mein soti hain

gulon ki nikhaten har chaar-su aawara hoti hain

wahan naghme saba ki narm-rau maujon mein bahte hain

wahan aab-e-rawan mein mastiyon ke raqs rahte hain

wahan hai ek duniya-e-tarannum aabshaaron mein

wahan taqsim hota hai tabassum lala-zaron mein

sunahri chand ki kirnen wahan raaton ko aati hain

wahan pariyan mohabbat ke KHuda ke git gati hain

kanar-e-ab-e-husn-o-ishq baham sair karte hain

gai-guzri ghalat-fahmi ka zikr-e-KHair karte hain

wahan ke rahne walon ko gunah karna nahin aata

zalil o mubtazil jazbaat se Darna nahin aata

wahan ahl-e-mohabbat ka na koi nam dharta hai

wahan ahl-e-mohabbat par na koi rashk karta hai

mohabbat karne walon ko wahan ruswa nahin karte

mohabbat karne walon ka wahan charcha nahin karte

hum aksar sochte hain tang aa kar kahin chal den

meri jaan! ai mere KHwabon ki duniya chal wahin chal den

ufuq ke us taraf kahte hain ek rangin wadi hai