raqs-e-agahi

rubā vo dīvāngī de mujhe

rachā.ūñ vo tāñDo

ki TuuT jaa.e ḳhāmoshī

khul jaa.eñ sile hue lab

paañv mere thirkeñ

to zamīn khisak jaa.e in qadmoñ tale

jo lutf-andoz mujhe iizā pahuñchā ke

maulā

vo barahnagī dekhī maiñ ne

jo dabīz poshākoñ meñ chhupā lī ga.ī

mujhe kaun suntā

ki faisloñ kī kursī par ma.azūr dimāġh baiThe the

maiñ ne dekhā ahl-e-rijāl ko

past-qāmatoñ ke ghere meñ

masḳhare jab ismat-darī karte haiñ fikr-o-dānish kī

tab murda ma.āshre kī be-hisī-o-bebasī ko

maiñ ne dekhā hai ma.abūd

maiñ ne saḌe-gale samāj meñ mohabbat ko pāmāl hote hue dekhā

rubā

vo dīvāngī de mujhe

rachā.ūñ vo tāñDo

ki nishāñ bhī na raheñ

zamīn-e-nāhaq ke

ruba wo diwangi de mujhe

rachaun wo tanDo

ki TuT jae KHamoshi

khul jaen sile hue lab

panw mere thirken

to zamin khisak jae in qadmon tale

jo lutf-andoz mujhe iza pahuncha ke

maula

wo barahnagi dekhi main ne

jo dabiz poshakon mein chhupa li gai

mujhe kaun sunta

ki faislon ki kursi par mazur dimagh baiThe the

main ne dekha ahl-e-rijal ko

past-qamaton ke ghere mein

masKHare jab ismat-dari karte hain fikr-o-danish ki

tab murda maashre ki be-hisi-o-bebasi ko

main ne dekha hai mabud

main ne saDe-gale samaj mein mohabbat ko pamal hote hue dekha

ruba

wo diwangi de mujhe

rachaun wo tanDo

ki nishan bhi na rahen

zamin-e-nahaq ke