ras ki anokhi lahren

maiñ ye chāhtī huuñ ki duniyā kī āñkheñ mujhe dekhtī jaa.eñ yuuñ dekhtī jaa.eñ jaise

koī peḌ kī narm Tahnī ko dekhe

lachaktī huī narm Tahnī ko dekhe

magar bojh pattoñ kā utre hue pairahan kī tarah sach ke saath hī farsh par ek maslā huā

Dher ban kar paḌā ho

maiñ ye chāhtī huuñ ki jhoñke havā ke lipaTte chale jaa.eñ mujh se

machalte hue chheḌ karte hue hañste hañste koī baat kahte hue laaj ke bojh

se rukte rukte sambhalte hue ras kī rañgīn sargoshiyoñ meñ

maiñ ye chāhtī huuñ kabhī chalte chalte kabhī dauḌte dauḌte baḌhtī jā.ūñ

havā jaise nadī kī lahroñ se chhūte hue sarsarāte hue bahtī jaatī hai ruktī

nahīñ hai

agar koī panchhī suhānī sadā meñ kahīñ giit gaa.e

to āvāz kī garm lahreñ mire jism se aa ke Takrā.eñ aur lauT jaa.eñ Thaharne na paa.eñ

kabhī garm kirneñ kabhī narm jhoñke

kabhī mīThī mīThī fusūñ-sāz bāteñ

kabhī kuchh kabhī kuchh na.e se nayā rañg ubhre

ubharte hī tahlīl ho jaa.e phailī fazā meñ

koī chiiz mere masarrat ke ghere meñ rukne na paa.e

masarrat kā gherā simaTtā chalā jā rahā hai

khulā khet gandum kā phailā huā hai

bahut duur ākāsh kā shāmiyāna anokhī masahrī banā.e rasīle ishāroñ se bahkā rahā hai

thapeḌoñ se paanī kī āvāz panchhī ke gītoñ meñ ghul kar phisalte hue ab nigāhoñ se ojhal huī jā rahī hai

maiñ baiThī huī huuñ

dupaTTā mere sar se Dhalkā huā hai

mujhe dhyān aatā nahīñ hai mire gesuoñ ko koī dekh legā

masarrat kā gherā simaTtā chalā jā rahā hai

bas ab aur koī na.ī chiiz mere masarrat ke ghere meñ aane na paa.e

main ye chahti hun ki duniya ki aankhen mujhe dekhti jaen yun dekhti jaen jaise

koi peD ki narm Tahni ko dekhe

lachakti hui narm Tahni ko dekhe

magar bojh patton ka utre hue pairahan ki tarah sach ke sath hi farsh par ek masla hua

Dher ban kar paDa ho

main ye chahti hun ki jhonke hawa ke lipaTte chale jaen mujh se

machalte hue chheD karte hue hanste hanste koi baat kahte hue laj ke bojh

se rukte rukte sambhalte hue ras ki rangin sargoshiyon mein

main ye chahti hun kabhi chalte chalte kabhi dauDte dauDte baDhti jaun

hawa jaise nadi ki lahron se chhute hue sarsaraate hue bahti jati hai rukti

nahin hai

agar koi panchhi suhani sada mein kahin git gae

to aawaz ki garm lahren mere jism se aa ke Takraen aur lauT jaen Thaharne na paen

kabhi garm kirnen kabhi narm jhonke

kabhi miThi miThi fusun-saz baaten

kabhi kuchh kabhi kuchh nae se naya rang ubhre

ubharte hi tahlil ho jae phaili faza mein

koi chiz mere masarrat ke ghere mein rukne na pae

masarrat ka ghera simaTta chala ja raha hai

khula khet gandum ka phaila hua hai

bahut dur aakash ka shamiyana anokhi masahri banae rasile ishaaron se bahka raha hai

thapeDon se pani ki aawaz panchhi ke giton mein ghul kar phisalte hue ab nigahon se ojhal hui ja rahi hai

main baiThi hui hun

dupaTTa mere sar se Dhalka hua hai

mujhe dhyan aata nahin hai mere gesuon ko koi dekh lega

masarrat ka ghera simaTta chala ja raha hai

bas ab aur koi nai chiz mere masarrat ke ghere mein aane na pae