rasm-e-andesha se farigh hue hum

rasm-e-andesha se fāriġh hue ham

apne dāmāñ kī shikan meñ simTe

kaf-e-ayyām kī pur-pech lakīroñ meñ kahīñ

apne ā.inda-e-nādīda se sahme hue ham

gaah ijmāl-e-guzishta pe gulū-gīr hue

jaise dhul jā.egā bechārī rivāyāt ke shānoñ kā ġhubār

chand bīmār irādoñ kī ayādat chāhī

gaah nāyāb duāoñ kā shumār

aur taqrīr ke pechīda savālāt ko dohrāte hue

ek ik kar ke sab ahbāb ne ruḳhsat chāhī

rasm-e-andesha kī taqrīb-e-mulāqāt se fāriġh hue ham

rasm-e-andesha kisī aur zamāne kā gunāh

aur duniyāoñ kā jurm

jis kī zanjīr-e-mukāfāt meñ uljhe hue ham

apne ajdād ke āsār ke derīna faqīr

kāsa-bar-dosh sar-e-dast-e-atā jaate haiñ

maut bar-dosh sar-e-dast-e-atā jaate haiñ

maut aur vasl kī ta.abīr pe sargarm-e-kalām

apnī tārīḳh kā insāf bajā laate haiñ

rasm-e-andesha kī tārīḳh-e-mukāfāt

ke maare hue ham

rasm-e-andesha se farigh hue hum

apne daman ki shikan mein simTe

kaf-e-ayyam ki pur-pech lakiron mein kahin

apne aainda-e-nadida se sahme hue hum

gah ijmal-e-guzishta pe gulu-gir hue

jaise dhul jaega bechaari riwayat ke shanon ka ghubar

chand bimar iradon ki ayaadat chahi

gah nayab duaon ka shumar

aur taqrir ke pechida sawalat ko dohraate hue

ek ek kar ke sab ahbab ne ruKHsat chahi

rasm-e-andesha ki taqrib-e-mulaqat se farigh hue hum

rasm-e-andesha kisi aur zamane ka gunah

aur duniyaon ka jurm

jis ki zanjir-e-mukafat mein uljhe hue hum

apne ajdad ke aasar ke derina faqir

kasa-bar-dosh sar-e-dast-e-ata jate hain

maut bar-dosh sar-e-dast-e-ata jate hain

maut aur wasl ki tabir pe sargarm-e-kalam

apni tariKH ka insaf baja late hain

rasm-e-andesha ki tariKH-e-mukafat

ke mare hue hum