rate ghazal

pahle makāñ ke rate baḌhe phir ġhizā ke rate

phir baḌhte baḌhte baḌh ga.e āb-o-havā ke rate

bheje haiñ mere yaar ne ḳhat meñ baḌhā ke rate

kaise adā karūñ maiñ ye nāz-o-adā ke rate

jal jal ke bujh gayā hai ye dil gas kī tarah

jab ham ne bill meñ dekhe haiñ bijlī jalā ke rate

gar ho sake to uñgliyāñ kānoñ meñ Thūñs deñ

aate haiñ ghar meñ phone kī ghanTī bajā ke rate

raftār meñ ye rail se baḌh kar haiñ tez-rau

kyā bas chale ki rate haiñ bus ke balā ke rate

chāhā sharāb chhoḌ duuñ khā kar koī davā

dekhā to haiñ sharāb se baḌh kar davā ke rate

arzāñ hai maut zindagī mahñgī hai dosto

pūchho kisī marīz se dārushshifā ke rate

pahle makan ke rate baDhe phir ghiza ke rate

phir baDhte baDhte baDh gae aab-o-hawa ke rate

bheje hain mere yar ne KHat mein baDha ke rate

kaise ada karun main ye naz-o-ada ke rate

jal jal ke bujh gaya hai ye dil gas ki tarah

jab hum ne bill mein dekhe hain bijli jala ke rate

gar ho sake to ungliyan kanon mein Thuns den

aate hain ghar mein phone ki ghanTi baja ke rate

raftar mein ye rail se baDh kar hain tez-rau

kya bas chale ki rate hain bus ke bala ke rate

chaha sharab chhoD dun kha kar koi dawa

dekha to hain sharab se baDh kar dawa ke rate

arzan hai maut zindagi mahngi hai dosto

puchho kisi mariz se darushshifa ke rate