raushni kam hai

raushnī kam hai na kar is kī shikāyat hamdam

raushnī kam hī rahe to achchhā

shādmānī-o-ḳhushī ke hamrāh

ik na ik ġham bhī rahe to achchhā

dasht-o-sahrā ho ki bāġh-o-bustāñ

sat.h-e-dariyā ho ki chatiyal maidāñ

raat har chiiz pe hai sāya-fashāñ

raushnī kam hai añdherā hī ziyāda hai yahāñ

shāh-rāhoñ ke nazāroñ pe na jā

qumqumoñ kī nazar-afroz qatāroñ pe na jā

kyūñki ik chashm-e-basīrat ke liye

jo bhī hai pesh-e-nazar

chashmak-e-barq hai yā raqs-e-sharar

aa zarā moḌ idhar ko bhī nigāheñ apnī

tīra-o-tār hai kitnī ye galī

TimTimātī hai jahāñ khambe par

ek mailī sī shikasta chimney

jis tarah naza.a meñ koī bīmār

kab talak raushnī phailā.egī ye

sub.h se pahle hī bujh jā.egī ye

aur phir ek ghaTā-Top añdherā hogā

is añdhere hī meñ bas is kā saverā hogā

aa ki ham ab dil-e-insāñ bhī TaToleñ chal kar

band haiñ ye jo darīche inheñ kholeñ chal kar

ek yā do ke sivā sab haiñ siyāhī se bhare

jaise patte shajar-e-ḳhushk meñ do-chār hare

tīra-o-tār hai kis darja zamīr-e-insāñ

raushnī is meñ kahāñ

raushnī kam hai añdherā hī ziyāda hai yahāñ

raushni kam hai na kar is ki shikayat hamdam

raushni kam hi rahe to achchha

shadmani-o-KHushi ke hamrah

ek na ek gham bhi rahe to achchha

dasht-o-sahra ho ki bagh-o-bustan

sath-e-dariya ho ki chatiyal maidan

raat har chiz pe hai saya-fashan

raushni kam hai andhera hi ziyaada hai yahan

shah-rahon ke nazaron pe na ja

qumqumon ki nazar-afroz qataron pe na ja

kyunki ek chashm-e-basirat ke liye

jo bhi hai pesh-e-nazar

chashmak-e-barq hai ya raqs-e-sharar

aa zara moD idhar ko bhi nigahen apni

tira-o-tar hai kitni ye gali

TimTimati hai jahan khambe par

ek maili si shikasta chimney

jis tarah naza mein koi bimar

kab talak raushni phailaegi ye

subh se pahle hi bujh jaegi ye

aur phir ek ghaTa-Top andhera hoga

is andhere hi mein bas is ka sawera hoga

aa ki hum ab dil-e-insan bhi TaTolen chal kar

band hain ye jo dariche inhen kholen chal kar

ek ya do ke siwa sab hain siyahi se bhare

jaise patte shajar-e-KHushk mein do-chaar hare

tira-o-tar hai kis darja zamir-e-insan

raushni is mein kahan

raushni kam hai andhera hi ziyaada hai yahan