raushni ke minar

do samundar jahāñ aapas meñ milā karte haiñ

maiñ ne kitne sahar o shaam guzāre haiñ vahāñ

maiñ ne dekhī hai nikalte hue sūraj kī kiran

aur kal hote hue din kī shafaq dekhī hai

maiñ ne maujoñ ke talātum meñ guhar DhūñDe haiñ

aur paa.e haiñ ḳhazaf reze bhī

jaal paanī se jab ik baar nikālā maiñ ne

ik ghaḌā ret bharā haath aayā

sabt thī mohr-e-sulaimāñ jis par

aur kholā to dhueñ kā bādal

peT se us ke numūdār huā

aadmī ke liye ye behtar hai

ki muqaffal hī raheñ kuchh chīzeñ

ye fazā.eñ ye sitāre ye falak

vaqt-e-gardāñ kī musalsal Tik Tik

jānvar kiiḌe makoḌe hashrāt

machhliyāñ aur tuyūr

aur insān jo pahle din se

āḳhirī roz talak

maut kī samt chalā kartā hai

justujū par mujhe uksāte haiñ

aah lekin ye talāsh

kar ga.ī aur bhī hairāñ mujh ko

kyuuñ vo kashtī huī sūrāḳh-zada

jis meñ ham raat ko paar utre the

raah chalte hue muDbheḌ huī thī jis se

kis ḳhatā par vo javāñ qatl huā

kitne be-bahra the tahzīb se is shahr ke log

jin ko aate na the mehmān-navāzī ke tarīq

phir bhalā kis liye un kī ḳhātir

ham ne girtī huī dīvār ko tāmīr kiyā

raaz par raaz chhupā rakkhe haiñ ik būḌhe ne

aur ham haiñ ki phirā karte haiñ

har larazte hue saa.e kā ta.āqub karte

sham.a kī lau jise har aan badal detī hai

do samundar kā jahāñ sañgam hai

maiñ ba-dastūr khaḌā rahtā huuñ

dekhtā huuñ kabhī uḌte hue zarrāt kā raqs

kabhī maujoñ ko sadā detā huuñ

aur aksar shab-e-tanhā.ī meñ baiThā baiThā

un jazīroñ ko takā kartā huuñ

jin ke jalte hue, bujhte hue mīnāra-e-nūr

merī manzil kā pata dete haiñ

do samundar jahan aapas mein mila karte hain

main ne kitne sahar o sham guzare hain wahan

main ne dekhi hai nikalte hue suraj ki kiran

aur kal hote hue din ki shafaq dekhi hai

main ne maujon ke talatum mein guhar DhunDe hain

aur pae hain KHazaf reze bhi

jal pani se jab ek bar nikala main ne

ek ghaDa ret bhara hath aaya

sabt thi mohr-e-sulaiman jis par

aur khola to dhuen ka baadal

peT se us ke numudar hua

aadmi ke liye ye behtar hai

ki muqaffal hi rahen kuchh chizen

ye fazaen ye sitare ye falak

waqt-e-gardan ki musalsal Tik Tik

jaanwar kiDe makoDe hashraat

machhliyan aur tuyur

aur insan jo pahle din se

aaKHiri roz talak

maut ki samt chala karta hai

justuju par mujhe uksate hain

aah lekin ye talash

kar gai aur bhi hairan mujh ko

kyun wo kashti hui suraKH-zada

jis mein hum raat ko par utre the

rah chalte hue muDbheD hui thi jis se

kis KHata par wo jawan qatl hua

kitne be-bahra the tahzib se is shahr ke log

jin ko aate na the mehman-nawazi ke tariq

phir bhala kis liye un ki KHatir

hum ne girti hui diwar ko tamir kiya

raaz par raaz chhupa rakkhe hain ek buDhe ne

aur hum hain ki phira karte hain

har larazte hue sae ka taaqub karte

shama ki lau jise har aan badal deti hai

do samundar ka jahan sangam hai

main ba-dastur khaDa rahta hun

dekhta hun kabhi uDte hue zarraat ka raqs

kabhi maujon ko sada deta hun

aur aksar shab-e-tanhai mein baiTha baiTha

un jaziron ko taka karta hun

jin ke jalte hue, bujhte hue minara-e-nur

meri manzil ka pata dete hain