raushni tez karo

raushnī tez karo, tez karo, tez karo

gum hai andesha-e-imroz kī zulmat meñ hayāt

zohra o maah se mahrūm hai jazbāt kī raat

zāfarāñ-zār bahishtoñ meñ bhī uḌtā hai ġhubār

ḳhuld-bardosh fazā.eñ haiñ jahannam ba-kanār

tishnagī sub.h kii, māmūra-e-hastī meñ hai aam

rakh do zulmat kī hathelī pe koī nuur kā jaam

aur is ġham ke añdhere ko na añgez karo

raushnī tez karo, tez karo, tez karo

dar-o-dīvār pe saa.e kī musalsal paikār

azdahe laḌte hue jaise miyān-e-kohsār

aur mehrāb-e-shikasta meñ purānī qindīl

be-par-o-bāl sī āñdhī kī satā.ī huī chiil

ḳhaak par ḳhuun meñ Duube hue qadmoñ ke nishāñ

sehn meñ kushta charāġhoñ kī chitāoñ kā dhuāñ

in chitāoñ ko saman-posh o saman-rez karo

raushnī tez karo, tez karo, tez karo

raushnī raah meñ baaqī hai na kāshānoñ meñ

qumqume TuuTe hue Dher haiñ vīrānoñ meñ

raat hai yā ki siyāhī kā koī koh-e-buland

kab sahar pheñkegī is koh pe kirnoñ kī kamand

yaas ne ziist ke ehsās ko gherā kyuuñ hai

ghuT gayā dam ye ghaTā-Top añdherā kyuuñ hai

sāthiyoñ! shīsha-e-gulnār ko gul-bez karo

raushnī tez karo, tez karo, tez karo,

jū-e-ḳhūñ chashm-e-tamannā se ravāñ hai ye kyuuñ

zindagī sū-e-tabassum nigarāñ hai ye kyuuñ

rūh-e-insāñ ko mile zulmat-e-daurāñ se najāt

saj do maġhmūm fazāoñ meñ charāġhoñ kī barāt

sogvārāna sahī jashn manānā hogā

kāñpte hāthoñ se ye jaam uThānā hogā

thaam kar dil ko uTho azm-e-tarab-ḳhez karo

raushnī tez karo, tez karo, tez karo

raushni tez karo, tez karo, tez karo

gum hai andesha-e-imroz ki zulmat mein hayat

zohra o mah se mahrum hai jazbaat ki raat

zafaran-zar bahishton mein bhi uDta hai ghubar

KHuld-bardosh fazaen hain jahannam ba-kanar

tishnagi subh ki, mamura-e-hasti mein hai aam

rakh do zulmat ki hatheli pe koi nur ka jam

aur is gham ke andhere ko na angez karo

raushni tez karo, tez karo, tez karo

dar-o-diwar pe sae ki musalsal paikar

azdahe laDte hue jaise miyan-e-kohsar

aur mehrab-e-shikasta mein purani qindil

be-par-o-baal si aandhi ki satai hui chil

KHak par KHun mein Dube hue qadmon ke nishan

sehn mein kushta charaghon ki chitaon ka dhuan

in chitaon ko saman-posh o saman-rez karo

raushni tez karo, tez karo, tez karo

raushni rah mein baqi hai na kashanon mein

qumqume TuTe hue Dher hain viranon mein

raat hai ya ki siyahi ka koi koh-e-buland

kab sahar phenkegi is koh pe kirnon ki kamand

yas ne zist ke ehsas ko ghera kyun hai

ghuT gaya dam ye ghaTa-Top andhera kyun hai

sathiyon! shisha-e-gulnar ko gul-bez karo

raushni tez karo, tez karo, tez karo,

ju-e-KHun chashm-e-tamanna se rawan hai ye kyun

zindagi su-e-tabassum nigaran hai ye kyun

ruh-e-insan ko mile zulmat-e-dauran se najat

saj do maghmum fazaon mein charaghon ki baraat

sogwarana sahi jashn manana hoga

kanpte hathon se ye jam uThana hoga

tham kar dil ko uTho azm-e-tarab-KHez karo

raushni tez karo, tez karo, tez karo