rawan hun main

ravāñ huuñ maiñ

aur is ravānī meñ

ahd-dar-ahd kī jarāhat-numā basārat kī ḳhaak kā vo bhañvar hai

jis meñ

mire shab-o-roz kā ġhubār-e-siyah

mire sañg ghūmtā hai

ravāñ huuñ maiñ

aur ḳhud pe aur sab pe hañs rahā huuñ

ki merī mānind ham sabhī vaqt kī khaḌī cycle kā

gardish-pazīr pahiya haiñ nā-masāfat-e-nau rū-gardāñ

ki nā-rasā.ī ke ḳhisht-ḳhānoñ kī chimniyoñ se nikalne vaale

hurūf-e-paspā ke sab dhueñ sarf-e-rā.egāñ haiñ

ye mehvar-e-ḳhāk kyā hai

kis gardish-e-muallaq kā isti.āra hai

ham kahāñ haiñ

maiñ hañs rahā huuñ

safed-mū sir pe kuhl-umrī kī barf rakkhe

ki aaj maiñ apne ahd kā aur shahr kā vo zamīr bhī huuñ

jo aaj aur kal ke moḌ par hai

jo dekhtā aur sochtā hai

ki ham buzurgān-e-sāhab-e-iḳhtiyār kī umr-ḳhurda dānish

khaḌe safar ke asiir vaqtoñ kī kaisī zanjīr ban ga.ī hai

ki jo hamārī siyah-shab ḳhaak se lipaT kar

sabhī kī taqdīr ban ga.ī hai

jo aaj se milne vaale kal kī har ek saa.at pe halqa halqa utar rahī hai

jo sochtā hai

ki ham buzurgān-e-sāhab-e-iḳhtiyār kī aañkh ḳhud se kaT kar

hamārī nauha-garī kī ārāsta shabīhoñ ko kal ke imkān ke nashroñ ko kab paḌegī

jo sochtā hai

ki ye salāsil kī raat lambī hai

aur na jaane tulū-e-sub.h-e-najāt kab ho

ki ham buzurgān-e-sāhab-e-iḳhtiyār ke faisle kī saa.at

hamāre ḳhvāboñ ke saath kab ho

rawan hun main

aur is rawani mein

ahd-dar-ahd ki jarahat-numa basarat ki KHak ka wo bhanwar hai

jis mein

mere shab-o-roz ka ghubar-e-siyah

mere sang ghumta hai

rawan hun main

aur KHud pe aur sab pe hans raha hun

ki meri manind hum sabhi waqt ki khaDi cycle ka

gardish-pazir pahiya hain na-masafat-e-nau ru-gardan

ki na-rasai ke KHisht-KHanon ki chimniyon se nikalne wale

huruf-e-paspa ke sab dhuen sarf-e-raegan hain

ye mehwar-e-KHak kya hai

kis gardish-e-muallaq ka istiara hai

hum kahan hain

main hans raha hun

safed-mu sir pe kuhl-umri ki barf rakkhe

ki aaj main apne ahd ka aur shahr ka wo zamir bhi hun

jo aaj aur kal ke moD par hai

jo dekhta aur sochta hai

ki hum buzurgan-e-sahab-e-iKHtiyar ki umr-KHurda danish

khaDe safar ke asir waqton ki kaisi zanjir ban gai hai

ki jo hamari siyah-shab KHak se lipaT kar

sabhi ki taqdir ban gai hai

jo aaj se milne wale kal ki har ek saat pe halqa halqa utar rahi hai

jo sochta hai

ki hum buzurgan-e-sahab-e-iKHtiyar ki aankh KHud se kaT kar

hamari nauha-gari ki aarasta shabihon ko kal ke imkan ke nashron ko kab paDegi

jo sochta hai

ki ye salasil ki raat lambi hai

aur na jaane tulu-e-subh-e-najat kab ho

ki hum buzurgan-e-sahab-e-iKHtiyar ke faisle ki saat

hamare KHwabon ke sath kab ho