naya shiwala

sach kah duuñ ai barhaman gar tū burā na maane

tere sanam-kadoñ ke but ho ga.e purāne

apnoñ se bair rakhnā tū ne butoñ se sīkhā

jañg-o-jadal sikhāyā vaa.iz ko bhī ḳhudā ne

tañg aa ke maiñ ne āḳhir dair o haram ko chhoḌā

vaa.iz kā va.az chhoḌā chhoḌe tire fasāne

patthar kī mūratoñ meñ samjhā hai tū ḳhudā hai

ḳhāk-e-vatan kā mujh ko har zarra devtā hai

aa ġhairiyat ke parde ik baar phir uThā deñ

bichhḌoñ ko phir milā deñ naqsh-e-duī miTā deñ

suunī paḌī huī hai muddat se dil kī bastī

aa ik nayā shivāla is des meñ banā deñ

duniyā ke tīrathoñ se ūñchā ho apnā tīrath

dāmān-e-āsmāñ se is kā kalas milā deñ

har sub.h uTh ke gaa.eñ mantar vo mīThe mīThe

saare pujāriyoñ ko mai piit kī pilā deñ

shaktī bhī shāntī bhī bhagtoñ ke giit meñ hai

dhartī ke bāsiyoñ kī muktī priit meñ hai

sach kah dun ai barhaman gar tu bura na mane

tere sanam-kadon ke but ho gae purane

apnon se bair rakhna tu ne buton se sikha

jang-o-jadal sikhaya waiz ko bhi KHuda ne

tang aa ke main ne aaKHir dair o haram ko chhoDa

waiz ka waz chhoDa chhoDe tere fasane

patthar ki muraton mein samjha hai tu KHuda hai

KHak-e-watan ka mujh ko har zarra dewta hai

aa ghairiyat ke parde ek bar phir uTha den

bichhDon ko phir mila den naqsh-e-dui miTa den

suni paDi hui hai muddat se dil ki basti

aa ek naya shiwala is des mein bana den

duniya ke tirathon se uncha ho apna tirath

daman-e-asman se is ka kalas mila den

har subh uTh ke gaen mantar wo miThe miThe

sare pujariyon ko mai pit ki pila den

shakti bhi shanti bhi bhagton ke git mein hai

dharti ke basiyon ki mukti prit mein hai