husul-e-azadi ki diqqaten

hind kā āzād ho jaanā koī āsāñ nahīñ

dekhnā tum ko abhī kyā kyā dikhāyā jā.egā

dekhnā tum se abhī kitne kiye jā.eñge makr

kis tarah tum ko abhī chakkar meñ laayā jā.egā

tum meñ Daalā jā.egā ik saḳht o nāzuk tafraqa

tum ko shah de de ke aapas meñ laḌāyā jā.egā

peshvāyān-e-mazāhib ko mileñgī rishvateñ

Dhoñg tablīġh aur shuddhī kā rachāyā jā.egā

dharm rakshā ke liye tum se liye jā.eñge ahd

tum ko maz.hab apnā ḳhatre meñ dikhāyā jā.egā

leaderoñ se hoñge va.ade ḳhil.at-o-in.ām ke

qillat o kasrat kā hañgāma uThāyā jā.egā

tum ko parvāna atā hogā ḳhitāb o jaah kā

tum ko ohde de ke lālach meñ phañsāyā jā.egā

gar ye tadbīreñ muqaddar se na raas aa.eñ to phir

dūsrī sūrat se tum ko Dagmagāyā jā.egā

intihā.ī barbariyat se liyā jā.egā kaam

band kar ke tum ko jailoñ meñ saḌāyā jā.egā

dāna-pānī kar diyā jā.egā bilkul tum pe band

tum ko bhūkoñ maar ke qabze meñ laayā jā.egā

garm lohe se tumhāre jism dāġhe jā.eñge

tum ko koḌe maar kar ullū banāyā jā.egā

jā.edādeñ sab tumhārī zabt kar lī jā.eñgī

bāl-bachchoñ par tumhāre zulm Dhāyā jā.egā

bāvajūd us ke bhī tum qaa.em rahe zid par agar

be-ta.ammul tum ko phāñsī par chaḌhāyā jā.egā

is tarah bhī tum agar laa.e na abrū par shikan

sar tumhāre paañv par āḳhir jhukāyā jā.egā

hind ka aazad ho jaana koi aasan nahin

dekhna tum ko abhi kya kya dikhaya jaega

dekhna tum se abhi kitne kiye jaenge makr

kis tarah tum ko abhi chakkar mein laya jaega

tum mein Dala jaega ek saKHt o nazuk tafraqa

tum ko shah de de ke aapas mein laDaya jaega

peshwayan-e-mazahib ko milengi rishwaten

Dhong tabligh aur shuddhi ka rachaya jaega

dharm raksha ke liye tum se liye jaenge ahd

tum ko mazhab apna KHatre mein dikhaya jaega

leaderon se honge wade KHilat-o-inam ke

qillat o kasrat ka hangama uThaya jaega

tum ko parwana ata hoga KHitab o jah ka

tum ko ohde de ke lalach mein phansaya jaega

gar ye tadbiren muqaddar se na ras aaen to phir

dusri surat se tum ko Dagmagaya jaega

intihai barbariyat se liya jaega kaam

band kar ke tum ko jailon mein saDaya jaega

dana-pani kar diya jaega bilkul tum pe band

tum ko bhukon mar ke qabze mein laya jaega

garm lohe se tumhaare jism daghe jaenge

tum ko koDe mar kar ullu banaya jaega

jaedaden sab tumhaari zabt kar li jaengi

baal-bachchon par tumhaare zulm Dhaya jaega

bawajud us ke bhi tum qaem rahe zid par agar

be-tammul tum ko phansi par chaDhaya jaega

is tarah bhi tum agar lae na abru par shikan

sar tumhaare panw par aaKHir jhukaya jaega