sachche watan-parast ka git

ḳhauf-e-āfat se kahāñ dil meñ riyā aa.egī

baat sachchī hai jo vo lab pe sadā aa.egī

dil se niklegī na mar kar bhī vatan kī ulfat

merī miTTī se bhī ḳhushbu-e-vafā aa.egī

maiñ uThā lūñgā baḌe shauq se us ko sar par

ḳhidmat-e-qaum-o-vatan meñ jo balā aa.egī

sāmnā sabr o shujā.at se karūñgā maiñ bhī

khiñch ke mujh tak jo kabhī teġh-e-jafā aa.egī

ġhair zo.am aur ḳhudī se jo karegā hamla

merī imdād ko ḳhud zāt-e-ḳhudā aa.egī

aatmā huuñ maiñ badal Dālūñgā fauran cholā

kyā bigāḌegī agar merī qazā aa.egī

ḳhuun ro.egī samā par mere marne pe shafaq

ġham manāne ke liye kaalī ghaTā aa.egī

abr-e-tar ashk bahā.egā mire lāshe par

ḳhaak uḌāne ke liye bād-e-sabā aa.egī

zindagānī meñ to milne se jhijaktī hai 'falak'

ḳhalq ko yaad mirī ba.ad-e-fanā aa.egī

KHauf-e-afat se kahan dil mein riya aaegi

baat sachchi hai jo wo lab pe sada aaegi

dil se niklegi na mar kar bhi watan ki ulfat

meri miTTi se bhi KHushbu-e-wafa aaegi

main uTha lunga baDe shauq se us ko sar par

KHidmat-e-qaum-o-watan mein jo bala aaegi

samna sabr o shujaat se karunga main bhi

khinch ke mujh tak jo kabhi tegh-e-jafa aaegi

ghair zoam aur KHudi se jo karega hamla

meri imdad ko KHud zat-e-KHuda aaegi

aatma hun main badal Dalunga fauran chola

kya bigaDegi agar meri qaza aaegi

KHun roegi sama par mere marne pe shafaq

gham manane ke liye kali ghaTa aaegi

abr-e-tar ashk bahaega mere lashe par

KHak uDane ke liye baad-e-saba aaegi

zindagani mein to milne se jhijakti hai 'falak'

KHalq ko yaad meri baad-e-fana aaegi