tarana-e-qaumi

marhabā ai ḳhāk-e-pāk-e-kishvar-e-hindostāñ

yādgār-e-ahd-e-māzī hai tū ai jān-e-jahāñ

kaise kaise auliyā guzre aur qutub-e-zamāñ

jin ke qadmoñ ne banāyā hai tujhe jannat-nishāñ

raushnī se tere phailā hai ujālā har taraf

terā duniyā meñ rahā hai bol-bālā har taraf

kyuuñ na kahiye tujh ko ik sarchashma-e-āb-e-baqā

haiñ ye āsār-e-qadīma tere ganj-e-be-bahā

roz o shab nairañgiyāñ terī haiñ kyā kyā jāñ-fazā

kis qadar hai rūh-parvar ye tirī āb-o-havā

gardish-e-ayyām se go maiñ phirūñ nazdīk o duur

har jagah yād-e-vatan hai māya-e-aish-o-surūr

ab to lāzim hai ki hoñ bedār abnā-e-vatan

ho diloñ meñ jazba-e-millat-parastī josh-zan

ġhalġhala terī satā.ish kā ho tā-charḳh-e-kuhan

aur tere jāñ-nisāroñ ke ho lab par ye suḳhan

miT nahīñ sakte kabhī tere usūl-e-ittifāq

kyuuñ na ho ai hind tujh ko daur-e-nau kā ishtiyāq

jabki jaarī ho zabānoñ par ye kalma sub.h o shaam

naġhma-hā-e-sāz se baḌh kar hai jo mojaz nizām

ya.anī sulh-o-āshtī kā deñ ham aapas meñ payām

mushkileñ āsān hoñ bigḌe hue ban jaa.eñ kaam

rūnumā jis kī badaulat jalva-e-ummīd ho

duur zulmat ho diloñ se aur ghar ghar iid ho

diin o aa.iiñ haiñ judā sab ke magar ai ḳhāk-e-hind

god meñ tere raheñ shīr-o-shakar ai ḳhāk-e-hind

terī ḳhidmat par jo bāñdheñge kamar ai ḳhāk-e-hind

hoñge vo tere liye silk-e-guhar ai ḳhāk-e-hind

zeb-o-zīnat meñ tū ai jān-e-jahāñ mash.hūr hai

ḳhair o barkat se tū ai hindostāñ ma.amūr hai

roz o shab qaumoñ ko hotī hai taraqqī yā zavāl

kar sakā lekin na tujh ko daur-e-gardūñ pā.emāl

har zamāne meñ rahā terā ajab jāh-o-jalāl

sāya-e-rahmat ne daa.im tujh ko rakkhā hai nihāl

gar nazar aa.e kabhī ġham kī ghaTā chhā.ī huī

Tal ga.ī hai sar se tere har balā aa.ī huī

iḳhtilāf-e-dīn-o-millat ke ye jhagḌe hoñ tamām

jo musībat ban ga.e haiñ aaj bahr-e-ḳhās-o-ām

hai mubārak jo tujhe hāsil hai amn o intizām

''bā musalmāñ allāh allāh bā barahman raam rām''

ḳhāksārī meñ tū ab tak shohra-e-āfāq hai

maḳhzan-e-fazl-o-hunar hai ma.adin-e-aḳhlāq hai

marhaba ai KHak-e-pak-e-kishwar-e-hindostan

yaadgar-e-ahd-e-mazi hai tu ai jaan-e-jahan

kaise kaise auliya guzre aur qutub-e-zaman

jin ke qadmon ne banaya hai tujhe jannat-nishan

raushni se tere phaila hai ujala har taraf

tera duniya mein raha hai bol-baala har taraf

kyun na kahiye tujh ko ek sarchashma-e-ab-e-baqa

hain ye aasar-e-qadima tere ganj-e-be-baha

roz o shab nairangiyan teri hain kya kya jaan-faza

kis qadar hai ruh-parwar ye teri aab-o-hawa

gardish-e-ayyam se go main phirun nazdik o dur

har jagah yaad-e-watan hai maya-e-aish-o-surur

ab to lazim hai ki hon bedar abna-e-watan

ho dilon mein jazba-e-millat-parasti josh-zan

ghalghala teri sataish ka ho ta-charKH-e-kuhan

aur tere jaan-nisaron ke ho lab par ye suKHan

miT nahin sakte kabhi tere usul-e-ittifaq

kyun na ho ai hind tujh ko daur-e-nau ka ishtiyaq

jabki jari ho zabanon par ye kalma subh o sham

naghma-ha-e-saz se baDh kar hai jo mojaz nizam

yani sulh-o-ashti ka den hum aapas mein payam

mushkilen aasan hon bigDe hue ban jaen kaam

runuma jis ki badaulat jalwa-e-ummid ho

dur zulmat ho dilon se aur ghar ghar id ho

din o aain hain juda sab ke magar ai KHak-e-hind

god mein tere rahen shir-o-shakar ai KHak-e-hind

teri KHidmat par jo bandhenge kamar ai KHak-e-hind

honge wo tere liye silk-e-guhar ai KHak-e-hind

zeb-o-zinat mein tu ai jaan-e-jahan mashhur hai

KHair o barkat se tu ai hindostan mamur hai

roz o shab qaumon ko hoti hai taraqqi ya zawal

kar saka lekin na tujh ko daur-e-gardun paemal

har zamane mein raha tera ajab jah-o-jalal

saya-e-rahmat ne daim tujh ko rakkha hai nihaal

gar nazar aae kabhi gham ki ghaTa chhai hui

Tal gai hai sar se tere har bala aai hui

iKHtilaf-e-din-o-millat ke ye jhagDe hon tamam

jo musibat ban gae hain aaj bahr-e-KHas-o-am

hai mubarak jo tujhe hasil hai amn o intizam

ba musalman allah allah ba barahman ram ram

KHaksari mein tu ab tak shohra-e-afaq hai

maKHzan-e-fazl-o-hunar hai madin-e-aKHlaq hai