26 january

aao ki aaj ġhaur kareñ is savāl par

dekhe the ham ne jo vo hasīñ ḳhvāb kyā hue

daulat baḌhī to mulk meñ iflās kyuuñ baḌhā

ḳhush-hālī-e-avām ke asbāb kyā hue

jo apne saath saath chale ku-e-dār tak

vo dost vo rafīq vo ahbāb kyā hue

kyā mol lag rahā hai shahīdoñ ke ḳhuun kā

marte the jin pe ham vo sazā-yāb kyā hue

be-kas barahnagī ko kafan tak nahīñ nasīb

vo va.ada-hā-e-atlas-o-kim-ḳhvāb kyā hue

jamhūriyat-navāz bashar-dost amn-ḳhvāh

ḳhud ko jo ḳhud diye the vo alqāb kyā hue

maz.hab kā rog aaj bhī kyuuñ lā-'ilāj hai

vo nusḳha-hā-e-nādir-o-nāyāb kyā hue

har kūcha sho'la-zār hai har shahr qatl-gāh

yak-jehtī-e-hayāt ke ādāb kyā hue

sahrā-e-tīrgī meñ bhaTaktī hai zindagī

ubhre the jo ufuq pe vo mahtāb kyā hue

mujrim huuñ maiñ agar to gunahgār tum bhī ho

ai rahbarān-e-qaum ḳhatā-kār tum bhī ho

aao ki aaj ghaur karen is sawal par

dekhe the hum ne jo wo hasin KHwab kya hue

daulat baDhi to mulk mein iflas kyun baDha

KHush-haali-e-awam ke asbab kya hue

jo apne sath sath chale ku-e-dar tak

wo dost wo rafiq wo ahbab kya hue

kya mol lag raha hai shahidon ke KHun ka

marte the jin pe hum wo saza-yab kya hue

be-kas barahnagi ko kafan tak nahin nasib

wo wada-ha-e-atlas-o-kim-KHwab kya hue

jamhuriyat-nawaz bashar-dost amn-KHwah

KHud ko jo KHud diye the wo alqab kya hue

mazhab ka rog aaj bhi kyun la-'ilaj hai

wo nusKHa-ha-e-nadir-o-nayab kya hue

har kucha sho'la-zar hai har shahr qatl-gah

yak-jehti-e-hayat ke aadab kya hue

sahra-e-tirgi mein bhaTakti hai zindagi

ubhre the jo ufuq pe wo mahtab kya hue

mujrim hun main agar to gunahgar tum bhi ho

ai rahbaran-e-qaum KHata-kar tum bhi ho