chhabbis january

ye daur-e-nau-mubārak farḳhanda-aḳhtarī kā

jamhūriyat kā āġhāz anjām qaisarī kā

kyā jāñ-fazā hai jalva ḳhurshīd-e-ḳhāvarī kā

har ik shuā-e-raqsāñ misra.a hai anvarī kā

roz-e-sa.īd aayā chhabbīs january kā

daur-e-jadīd laayā bhārat kī bartarī kā

bhārat kī bartarī meñ kis ko kalām hai ab

thā jo rahīn-e-pastī gardūñ-maqām hai ab

jamhūriyat pe qaa.em saarā nizām hai ab

aalā hai yā hai adnā bā-ehtirām hai ab

roz-e-sa.īd aayā chhabbīs january kā

daur-e-jadīd laayā bhārat kī bartarī kā

sadiyoñ ke band TuuTe āzād hoga.e ham

qaid-e-girāñ se chhūTe dil-e-shād ho ga.e ham

be-ḳhauf be-niyāz-e-sayyād ho ga.e ham

phir bas gayā nasheman ābād hoga.e ham

roz-e-sa.īd aayā chhabbīs january kā

daur-e-jadīd laayā bhārat kī bartarī kā

jo muztarib thī dil meñ vo aarzū bar aa.ī

takmīl-e-ārzū ne dil kī ḳhalish miTā.ī

jis mulk par ġhulāmī ban ban ke shaam chhā.ī

sub.h-e-masarrat us ko allāh ne dikhā.ī

roz-e-sa.īd aayā chhabbīs january kā

daur-e-jadīd laayā bhārat kī bartarī kā

ta.abīr-e-ḳhvāb-e-'gāñdhī' tafsīr-e-hāl-e-'nehrū'

'āzād' kī riyāzat 'sardār' kī tagāpū

raḳhshāñ hai hurriyat kā zebā-nigār dil-jū

taskīn-e-qalb muslim ārām-e-jān-e-hindū

roz-e-sa.īd aayā chhabbīs january kā

daur-e-jadīd laayā bhārat kī bartarī kā

qurbāñ hue jo is par rūheñ haiñ shaad un kī

ham jis se bahra-var haiñ vo hai murād un kī

hai bas-ki sarfaroshī shāyān-e-dād un kī

bhārat kī is ḳhushī meñ shāmil hai yaad un kī

roz-e-sa.īd aayā chhabbīs january kā

daur-e-jadīd laayā bhārat kī bartarī kā

āzād ho gayā jab hindostāñ hamārā

hai suud ke barābar har ik ziyāñ hamārā

manzil pe aan pahuñchā jab kārvāñ hamārā

kyuuñ ho ġhubār-e-manzil ḳhātir-nishāñ hamārā

roz-e-sa.īd aayā chhabbīs january kā

daur-e-jadīd laayā bhārat kī bartarī kā

aivān-e-farruḳhī kī tāmīr-e-nau mubārak

ā.īn-e-zindagī kī tadbīr-e-nau mubārak

har zarra-e-vatan ko tanvīr-e-nau mubārak

bhārat ke har bashar ko tauqīr-e-nau mubārak

roz-e-sa.īd aayā chhabbīs january kā

daur-e-jadīd laayā bhārat kī bartarī kā

bhārat kā azm hai ye taufīq ai ḳhudā de

duniyā se īn-o-āñ kī tafrīq ko miTā de

amn-o-amāñ se rahnā har mulk ko sikhā de

har qaum shukriye meñ har saal ye sadā de

roz-e-sa.īd aayā chhabbīs january kā

daur-e-jadīd laayā bhārat kī bartarī kā

ye daur-e-nau-mubarak farKHanda-aKHtari ka

jamhuriyat ka aaghaz anjam qaisari ka

kya jaan-faza hai jalwa KHurshid-e-KHawari ka

har ek shua-e-raqsan misra hai anwari ka

roz-e-said aaya chhabbis january ka

daur-e-jadid laya bhaarat ki bartari ka

bhaarat ki bartari mein kis ko kalam hai ab

tha jo rahin-e-pasti gardun-maqam hai ab

jamhuriyat pe qaem sara nizam hai ab

aala hai ya hai adna ba-ehtiram hai ab

roz-e-said aaya chhabbis january ka

daur-e-jadid laya bhaarat ki bartari ka

sadiyon ke band TuTe aazad hogae hum

qaid-e-giran se chhuTe dil-e-shad ho gae hum

be-KHauf be-niyaz-e-sayyaad ho gae hum

phir bas gaya nasheman aabaad hogae hum

roz-e-said aaya chhabbis january ka

daur-e-jadid laya bhaarat ki bartari ka

jo muztarib thi dil mein wo aarzu bar aai

takmil-e-arzu ne dil ki KHalish miTai

jis mulk par ghulami ban ban ke sham chhai

subh-e-masarrat us ko allah ne dikhai

roz-e-said aaya chhabbis january ka

daur-e-jadid laya bhaarat ki bartari ka

tabir-e-KHwab-e-'gandhi' tafsir-e-haal-e-'nehru'

'azad' ki riyazat 'sardar' ki tagapu

raKHshan hai hurriyat ka zeba-nigar dil-ju

taskin-e-qalb muslim aaram-e-jaan-e-hindu

roz-e-said aaya chhabbis january ka

daur-e-jadid laya bhaarat ki bartari ka

qurban hue jo is par ruhen hain shad un ki

hum jis se bahra-war hain wo hai murad un ki

hai bas-ki sarfaroshi shayan-e-dad un ki

bhaarat ki is KHushi mein shamil hai yaad un ki

roz-e-said aaya chhabbis january ka

daur-e-jadid laya bhaarat ki bartari ka

aazad ho gaya jab hindostan hamara

hai sud ke barabar har ek ziyan hamara

manzil pe aan pahuncha jab karwan hamara

kyun ho ghubar-e-manzil KHatir-nishan hamara

roz-e-said aaya chhabbis january ka

daur-e-jadid laya bhaarat ki bartari ka

aiwan-e-farruKHi ki tamir-e-nau mubarak

aain-e-zindagi ki tadbir-e-nau mubarak

har zarra-e-watan ko tanwir-e-nau mubarak

bhaarat ke har bashar ko tauqir-e-nau mubarak

roz-e-said aaya chhabbis january ka

daur-e-jadid laya bhaarat ki bartari ka

bhaarat ka azm hai ye taufiq ai KHuda de

duniya se in-o-an ki tafriq ko miTa de

amn-o-aman se rahna har mulk ko sikha de

har qaum shukriye mein har sal ye sada de

roz-e-said aaya chhabbis january ka

daur-e-jadid laya bhaarat ki bartari ka