hindostan mera

desoñ meñ sab se achchhā hindostān merā

rū-e-zamīñ pe jannat, jannat-nishān merā

hindostān merā, hindostān merā

vo pyārā pyārā manzar, vo mohnī fazā.eñ

vo ūñche ūñche parbat vo dil-fazā guphā.eñ

hindostān merā, hindostān merā

tīnoñ taraf samundar, chauthī taraf himāla

hai pāsbān is kaa, is kā banāne vaalā

hindostān merā, hindostān merā

ġhunchoñ kā vo chaTaknā, phūloñ kā vo mahaknā

panchhī pakheruoñ kā vo sub.h-dam chahaknā

hindostān merā, hindostān merā

dhīme suroñ meñ gañgā ye giit gā rahī hai

jamunā bhī apne muñh meñ ye gungunā rahī hai

hindostān merā, hindostān merā

gokul kā ik gvālā bansī bajā rahā hai

bansī kī lai meñ vo bhī ik giit gā rahā hai

hindostān merā, hindostān merā

duniyā ke saare meve is gulsitān meñ haiñ

sab nemateñ mayassar hindostān meñ haiñ

hindostān merā, hindostān merā

merā nishāñ yahī hai, merā jahāñ yahī hai

jannat mirī yahī hai, merā makāñ yahī hai

hindostān merā, hindostān merā

deson mein sab se achchha hindostan mera

ru-e-zamin pe jannat, jannat-nishan mera

hindostan mera, hindostan mera

wo pyara pyara manzar, wo mohni fazaen

wo unche unche parbat wo dil-faza guphaen

hindostan mera, hindostan mera

tinon taraf samundar, chauthi taraf himala

hai pasban is ka, is ka banane wala

hindostan mera, hindostan mera

ghunchon ka wo chaTakna, phulon ka wo mahakna

panchhi pakheruon ka wo subh-dam chahakna

hindostan mera, hindostan mera

dhime suron mein ganga ye git ga rahi hai

jamuna bhi apne munh mein ye gunguna rahi hai

hindostan mera, hindostan mera

gokul ka ek gwala bansi baja raha hai

bansi ki lai mein wo bhi ek git ga raha hai

hindostan mera, hindostan mera

duniya ke sare mewe is gulsitan mein hain

sab nematen mayassar hindostan mein hain

hindostan mera, hindostan mera

mera nishan yahi hai, mera jahan yahi hai

jannat meri yahi hai, mera makan yahi hai

hindostan mera, hindostan mera