hubb-e-qaumi

hubb-e-qaumī kā zabāñ par in dinoñ afsāna hai

bāda-e-ulfat se pur dil kā mire paimāna hai

jis jagah dekho mohabbat kā vahāñ afsāna hai

ishq meñ apne vatan ke har bashar dīvāna hai

jab ki ye āġhāz hai anjām kā kyā pūchhnā

bāda-e-ulfat kā ye to pahlā hī paimāna hai

hai jo raushan bazm meñ qaumī taraqqī kā charāġh

dil fidā har ik kā us par sūrat-e-parvāna hai

mujh se is hamdardī-o-ulfat kā kyā hove bayāñ

jo hai vo qaumī taraqqī ke liye dīvāna hai

lutf yaktā.ī meñ jo hai vo duī meñ hai kahāñ

bar-ḳhilāf is ke jo ho samjho ki vo dīvāna hai

naḳhl-e-ulfat jin kī koshish se ugā hai qaum meñ

qābil-e-tārīf un kī himmat-e-mardāna hai

hai gul-e-maqsūd se pur gulshan-e-kashmīr aaj

dushmanī nā-ittifāqī sabza-e-begāna hai

dur-fishāñ hai har zabāñ hubb-e-vatan ke vasf meñ

josh-zan har samt bahr-e-himmat-e-mardāna hai

ye mohabbat kī fazā qaa.em huī hai aap se

aap kā lāzim tah-e-dil se hameñ shukrāna hai

har bashar ko hai bharosā aap kī imdād par

aap kī hamdardiyoñ kā duur duur afsāna hai

jam.a haiñ qaumī taraqqī ke liye arbāb-e-qaum

rashk-e-firdaus un ke qadmoñ se ye shādī-ḳhāna hai

hubb-e-qaumi ka zaban par in dinon afsana hai

baada-e-ulfat se pur dil ka mere paimana hai

jis jagah dekho mohabbat ka wahan afsana hai

ishq mein apne watan ke har bashar diwana hai

jab ki ye aaghaz hai anjam ka kya puchhna

baada-e-ulfat ka ye to pahla hi paimana hai

hai jo raushan bazm mein qaumi taraqqi ka charagh

dil fida har ek ka us par surat-e-parwana hai

mujh se is hamdardi-o-ulfat ka kya howe bayan

jo hai wo qaumi taraqqi ke liye diwana hai

lutf yaktai mein jo hai wo dui mein hai kahan

bar-KHilaf is ke jo ho samjho ki wo diwana hai

naKHl-e-ulfat jin ki koshish se uga hai qaum mein

qabil-e-tarif un ki himmat-e-mardana hai

hai gul-e-maqsud se pur gulshan-e-kashmir aaj

dushmani na-ittifaqi sabza-e-begana hai

dur-fishan hai har zaban hubb-e-watan ke wasf mein

josh-zan har samt bahr-e-himmat-e-mardana hai

ye mohabbat ki faza qaem hui hai aap se

aap ka lazim tah-e-dil se hamein shukrana hai

har bashar ko hai bharosa aap ki imdad par

aap ki hamdardiyon ka dur dur afsana hai

jama hain qaumi taraqqi ke liye arbab-e-qaum

rashk-e-firdaus un ke qadmon se ye shadi-KHana hai