inqalab

zamāne kī havā badlī udhar rañg-e-chaman badlā

guloñ ne jab ravish badlī anādil ne vatan badlā

tarīqa āshnā.ī kā kabhī aisā na badlā thā

ki chaal ushshāq ne badlī hasīnoñ ne chalan badlā

badalte aa.e haiñ yuuñ to hamesha daur gardūñ ke

na aisā bhī ki ham badle hamārā kul jatan badlā

maqāsid maz.hab o millat ke badle daur-e-ālam ne

sahā.if kī sharh badlī kitāboñ kā matan badlā

badal Daalā hai aisā maġhribī tahzīb ne ham ko

mazāq-e-ḳhvān-e-nemat aur tarz-e-pairahan badlā

purānī chaal be-Dhañgī hamārī dekheñ kab badle

abhī tak jug hī badle the ġhazab ye hai qaran badlā

na badlā par na badlā haa.e tarz-e-muasharat qaumī

agarche saarī duniyā kā hunar aur ilm-o-fan badlā

nizām-e-shā.erī meñ haa.e aayā inqalāb aisā

ki shān-e-nazm badlī aur andāz-e-suḳhan badlā

salīqa intiqād-e-jins-e-hirfat kā nahīñ ham ko

zar-e-ḳhālis se abresham-numā europe ne san badlā

na badlā hai na badlegā faqat qānūn-e-islāmī

'qamar' jab tak ki qudrat ne na ye charḳh-e-kuhan badlā

zamane ki hawa badli udhar rang-e-chaman badla

gulon ne jab rawish badli anadil ne watan badla

tariqa aashnai ka kabhi aisa na badla tha

ki chaal ushshaq ne badli hasinon ne chalan badla

badalte aae hain yun to hamesha daur gardun ke

na aisa bhi ki hum badle hamara kul jatan badla

maqasid mazhab o millat ke badle daur-e-alam ne

sahaif ki sharh badli kitabon ka matan badla

badal Dala hai aisa maghribi tahzib ne hum ko

mazaq-e-KHwan-e-nemat aur tarz-e-pairahan badla

purani chaal be-Dhangi hamari dekhen kab badle

abhi tak jug hi badle the ghazab ye hai qaran badla

na badla par na badla hae tarz-e-muasharat qaumi

agarche sari duniya ka hunar aur ilm-o-fan badla

nizam-e-shaeri mein hae aaya inqalab aisa

ki shan-e-nazm badli aur andaz-e-suKHan badla

saliqa intiqad-e-jins-e-hirfat ka nahin hum ko

zar-e-KHalis se abresham-numa europe ne san badla

na badla hai na badlega faqat qanun-e-islami

'qamar' jab tak ki qudrat ne na ye charKH-e-kuhan badla