wo subh kabhi to aaegi

1

vo sub.h kabhī to aa.egī

in kaalī sadiyoñ ke sar se jab raat kā āñchal Dhalkegā

jab dukh ke bādal pighleñge jab sukh kā sāgar chhalkegā

jab ambar jhuum ke nāchegā jab dhartī naġhme gā.egī

vo sub.h kabhī to aa.egī

jis sub.h kī ḳhātir jug jug se ham sab mar mar kar jiite haiñ

jis sub.h ke amrit kī dhun meñ ham zahr ke pyāle piite haiñ

in bhūkī pyāsī rūhoñ par ik din to karam farmā.egī

vo sub.h kabhī to aa.egī

maanā ki abhī tere mere armānoñ kī qīmat kuchh bhī nahīñ

miTTī kā bhī hai kuchh mol magar insānoñ kī qīmat kuchh bhī nahīñ

insānoñ kī izzat jab jhūTe sikkoñ meñ na taulī jā.egī

vo sub.h kabhī to aa.egī

daulat ke liye jab aurat kī ismat ko na bechā jā.egā

chāhat ko na kuchlā jā.egā ġhairat ko na bechā jā.egā

apne kaale kartūtoñ par jab ye duniyā sharmā.egī

vo sub.h kabhī to aa.egī

bīteñge kabhī to din āḳhir ye bhuuk ke aur bekārī ke

TūTeñge kabhī to but āḳhir daulat kī ijāra-dārī ke

jab ek anokhī duniyā kī buniyād uThā.ī jā.egī

vo sub.h kabhī to aa.egī

majbūr buḌhāpā jab suunī rāhoñ kī dhuul na phāñkegā

ma.asūm laḌakpan jab gandī galiyoñ meñ bhiik na māñgegā

haq māñgne vāloñ ko jis din suulī na dikhā.ī jā.egī

vo sub.h kabhī to aa.egī

fāqoñ kī chitāoñ par jis din insāñ na jalā.e jā.eñge

sīnoñ ke dahakte dozaḳh meñ armāñ na jalā.e jā.eñge

ye narak se bhī gandī duniyā jab sovarg banā.ī jā.egī

vo sub.h kabhī to aa.egī

2

vo sub.h hamīñ se aa.egī

jab dhartī karvaT badlegī jab qaid se qaidī chhūTeñge

jab paap gharauñde phūTeñge jab zulm ke bandhan TūTeñge

us sub.h ko ham hī lā.eñge vo sub.h hamīñ se aa.egī

vo sub.h hamīñ se aa.egī

manhūs samājī Dhāñchoñ meñ jab zulm na paale jā.eñge

jab haath na kaaTe jā.eñge jab sar na uchhāle jā.eñge

jailoñ ke binā jab duniyā kī sarkār chalā.ī jā.egī

vo sub.h hamīñ se aa.egī

sansār ke saare mehnat-kash khetoñ se miloñ se nikleñge

be-ghar be-dar be-bas insāñ tārīk biloñ se nikleñge

duniyā amn aur ḳhush-hālī ke phūloñ se sajā.ī jā.egī

vo sub.h hamīñ se aa.egī

1

wo subh kabhi to aaegi

in kali sadiyon ke sar se jab raat ka aanchal Dhalkega

jab dukh ke baadal pighlenge jab sukh ka sagar chhalkega

jab ambar jhum ke nachega jab dharti naghme gaegi

wo subh kabhi to aaegi

jis subh ki KHatir jug jug se hum sab mar mar kar jite hain

jis subh ke amrit ki dhun mein hum zahr ke pyale pite hain

in bhuki pyasi ruhon par ek din to karam farmaegi

wo subh kabhi to aaegi

mana ki abhi tere mere armanon ki qimat kuchh bhi nahin

miTTi ka bhi hai kuchh mol magar insanon ki qimat kuchh bhi nahin

insanon ki izzat jab jhuTe sikkon mein na tauli jaegi

wo subh kabhi to aaegi

daulat ke liye jab aurat ki ismat ko na becha jaega

chahat ko na kuchla jaega ghairat ko na becha jaega

apne kale kartuton par jab ye duniya sharmaegi

wo subh kabhi to aaegi

bitenge kabhi to din aaKHir ye bhuk ke aur bekari ke

TuTenge kabhi to but aaKHir daulat ki ijara-dari ke

jab ek anokhi duniya ki buniyaad uThai jaegi

wo subh kabhi to aaegi

majbur buDhapa jab suni rahon ki dhul na phankega

masum laDakpan jab gandi galiyon mein bhik na mangega

haq mangne walon ko jis din suli na dikhai jaegi

wo subh kabhi to aaegi

faqon ki chitaon par jis din insan na jalae jaenge

sinon ke dahakte dozaKH mein arman na jalae jaenge

ye narak se bhi gandi duniya jab sowarg banai jaegi

wo subh kabhi to aaegi

2

wo subh hamin se aaegi

jab dharti karwaT badlegi jab qaid se qaidi chhuTenge

jab pap gharaunde phuTenge jab zulm ke bandhan TuTenge

us subh ko hum hi laenge wo subh hamin se aaegi

wo subh hamin se aaegi

manhus samaji Dhanchon mein jab zulm na pale jaenge

jab hath na kaTe jaenge jab sar na uchhaale jaenge

jailon ke bina jab duniya ki sarkar chalai jaegi

wo subh hamin se aaegi

sansar ke sare mehnat-kash kheton se milon se niklenge

be-ghar be-dar be-bas insan tarik bilon se niklenge

duniya amn aur KHush-haali ke phulon se sajai jaegi

wo subh hamin se aaegi