rikshe wala

dekho ġharīb kitnī zahmat uThā rahā hai

galiyoñ meñ bhiiḌ vaalī rickshaw chalā rahā hai

mahrūm hai agarche duniyā kī ne.amatoñ se

har bojh zindagī kā hañs kar uThā rahā hai

barsāt meñ bhī dekho phirtā huā saḌak par

rickshaw bhī bhīgtā hai ḳhud bhī nahā rahā hai

garmī kī dhuup meñ bhī ruktā nahīñ hai ghar meñ

pur-pech rāstoñ ke phere lagā rahā hai

sardī se kāñptā hai kapḌe phaTe hue haiñ

ThanDī havā se ḳhud ko kaise bachā rahā hai

mastī meñ dauḌtā hai rickshaw liye saḌak par

naġhma koī surīlā ab gungunā rahā hai

rikshe ke pedaloñ par rakhe haiñ paañv donoñ

āñkheñ haiñ rāste par ghanTī bajā rahā hai

maañ baap muntazir haiñ ghar par sabhī ke 'ādil'

bachchoñ ko ab vo lene schōl jā rahā hai

dekho gharib kitni zahmat uTha raha hai

galiyon mein bhiD wali rickshaw chala raha hai

mahrum hai agarche duniya ki neamaton se

har bojh zindagi ka hans kar uTha raha hai

barsat mein bhi dekho phirta hua saDak par

rickshaw bhi bhigta hai KHud bhi naha raha hai

garmi ki dhup mein bhi rukta nahin hai ghar mein

pur-pech raston ke phere laga raha hai

sardi se kanpta hai kapDe phaTe hue hain

ThanDi hawa se KHud ko kaise bacha raha hai

masti mein dauDta hai rickshaw liye saDak par

naghma koi surila ab gunguna raha hai

rikshe ke pedalon par rakhe hain panw donon

aankhen hain raste par ghanTi baja raha hai

man bap muntazir hain ghar par sabhi ke 'adil'

bachchon ko ab wo lene school ja raha hai