riwayat na TuTe

ham rivāyāt kī kohna sadiyoñ ke parbat tale

vo ghane sabz jañgal haiñ jo

be-panāh shāḳh-dar-shāḳh tābindagī

tāzgī ke tamavvuj se sañvlā ke

ḳhud hī jhulas jaa.eñ

aise jaleñ aise jaleñ

ki faqat duur tak ko.elā ko.elā hī dikhā.ī de

aur tāzgī kī numū

ḳhaak se bhī gavāhī na de

vo muqaddar ke achchhe

ki jin ko jalāpe kī muddat guzarne pe

un ko.eloñ kī jagah hiire motī mile

vo muqaddar ke achchhe

ki jin kī duā.eñ zamīñ kī tahoñ meñ vahīñ

to kahīñ sonā chāñdī baneñ

vo muqaddar ke achchhe

ki jin ke badan kholte ḳhuuñ ke chashme the

ab bhī haiñ

paare kī kānoñ kī sūrat kahīñ

to kahīñ aise bhī saḳht jānoñ ke haiñ silsile jā-ba-jā

jin se faulād kā naam pā.inda hai

vo jalan jo kabhī tāzgī ke tamavvuj se paidā huī

hai muqaddar kī tahrīr aisī ki jis kī jalan ibtidā

intihā bhī jalan

jalte rahne kā ye sāneha bhī jalan

anjuman anjuman

chaudhvīñ-rāt ke chāñd ne bhī kahā

bhīgī barsāt ke ra.ad ne bhī kahā

tum vahī ho ki jin ko chaTaḳhne kī mohlat bhī miltī nahīñ

ab rivāyat yahī hai

nibhāo hañso

muskurāo jalo

har ik zard chehra gulābī karo

har ik aañkh ko arġhavānī karo

magar yaad rakkho

rivāyat na TuuTe

tamavvuj kī har tāzgī laakh jhulse

rivāyat na TuuTe

hum riwayat ki kohna sadiyon ke parbat tale

wo ghane sabz jangal hain jo

be-panah shaKH-dar-shaKH tabindagi

tazgi ke tamawwuj se sanwla ke

KHud hi jhulas jaen

aise jalen aise jalen

ki faqat dur tak koela koela hi dikhai de

aur tazgi ki numu

KHak se bhi gawahi na de

wo muqaddar ke achchhe

ki jin ko jalape ki muddat guzarne pe

un koelon ki jagah hire moti mile

wo muqaddar ke achchhe

ki jin ki duaen zamin ki tahon mein wahin

to kahin sona chandi banen

wo muqaddar ke achchhe

ki jin ke badan kholte KHun ke chashme the

ab bhi hain

pare ki kanon ki surat kahin

to kahin aise bhi saKHt jaanon ke hain silsile ja-ba-ja

jin se faulad ka nam painda hai

wo jalan jo kabhi tazgi ke tamawwuj se paida hui

hai muqaddar ki tahrir aisi ki jis ki jalan ibtida

intiha bhi jalan

jalte rahne ka ye saneha bhi jalan

anjuman anjuman

chaudhwin-raat ke chand ne bhi kaha

bhigi barsat ke rad ne bhi kaha

tum wahi ho ki jin ko chaTaKHne ki mohlat bhi milti nahin

ab riwayat yahi hai

nibhao hanso

muskurao jalo

har ek zard chehra gulabi karo

har ek aankh ko arghawani karo

magar yaad rakkho

riwayat na TuTe

tamawwuj ki har tazgi lakh jhulse

riwayat na TuTe