ruThi hui nind aane se pahle

yuuñ aaj in āñkhoñ se ḳhafā niiñd huī hai

ham us ko manā.eñ bhī to kis tarh manā.eñ

ḳhāmosh sitāroñ meñ koī ḳhvāb sajā.eñ

yādoñ se kaheñ tum hī zarā palkoñ meñ aao

un hoñToñ ko zulfoñ ko nigāhoñ ko bulāo

us chehre kī shādābī-e-ḳhush-rang ko chūmeñ

us shoḳh kī har baat pe har lafz pe jhūmeñ

us jism ke har phuul ko āñkhoñ se lagā.eñ

kuchh pichhlī mulāqātoñ ko pahlū meñ biThā.eñ

guzre hue lamhāt kī tasvīr banā.eñ

tārīk fazāoñ meñ koī rang ubhāreñ

yuuñ lamha-ba-lamha ye shab-e-sabr guzāreñ

yā rone lageñ dard-o-ġham o fikr ke maare

nākām umangoñ se kahīñ aañsū bahā.eñ

majbūrī-e-ayyām ke sahrāoñ meñ bhaTkeñ

zaḳhmoñ ke samundar meñ koī naav chalā.eñ

siine ke har ik daaġh ko kāñToñ se TaToleñ

kuchh shikve lab-e-ġham pe bulā laa.eñ kahīñ se

ehsās ke chehre pe yūñhī Dāleñ ḳharāsheñ

aahoñ se kabhī ashkoñ se lamhoñ ko sañvāreñ

yuuñ lamha-ba-lamha ye shab-e-sabr guzāreñ

yun aaj in aankhon se KHafa nind hui hai

hum us ko manaen bhi to kis tarh manaen

KHamosh sitaron mein koi KHwab sajaen

yaadon se kahen tum hi zara palkon mein aao

un honTon ko zulfon ko nigahon ko bulao

us chehre ki shadabi-e-KHush-rang ko chumen

us shoKH ki har baat pe har lafz pe jhumen

us jism ke har phul ko aankhon se lagaen

kuchh pichhli mulaqaton ko pahlu mein biThaen

guzre hue lamhat ki taswir banaen

tarik fazaon mein koi rang ubhaaren

yun lamha-ba-lamha ye shab-e-sabr guzaren

ya rone lagen dard-o-gham o fikr ke mare

nakaam umangon se kahin aansu bahaen

majburi-e-ayyam ke sahraon mein bhaTken

zaKHmon ke samundar mein koi naw chalaen

sine ke har ek dagh ko kanTon se TaTolen

kuchh shikwe lab-e-gham pe bula laen kahin se

ehsas ke chehre pe yunhi Dalen KHarashen

aahon se kabhi ashkon se lamhon ko sanwaren

yun lamha-ba-lamha ye shab-e-sabr guzaren