sal-girah ka tohfa

merī bārahveñ sāl-girah par

sab ne navāzā tohfe de kar

abbā ik cycle le aa.e

ammī ne laDDū banvā.e

diidī ne kapḌe silvā.e

bhayyā geñd aur ballā laa.e

har ik kuchh na kuchh laayā thā

ik tohfa thā master jī kā

master jī laa.e the khilaunā

sab se alag sab se nirālā

ik qatār meñ tiin the bandar

kyā ḳhūbī thī un ke andar

ik thā haath se āñkheñ mūñde

dūsrā muñh par haath thā rakkhe

aur jo tīsrā bandar dekhā

haath jo thā kānoñ par rakkhā

master jī se pūchhā maiñ ne

kaisā khilaunā hai kyā jaane

kahne lage lo ġhaur se sun lo

pahle sun lo phir muñh kholo

ik kahtā hai burā na dekho

dūsrā bole burā na bolo

aur tīsre kā ye hai kahnā

burā kisī se kabhī na sunñā

kyuuñ bha.ī kaisā hai ye tohfa

hai ki nahīñ ye sab kī pasand kā

master jī kī bāteñ sun kar

milī nasīhat sāl-girah par

ḳhush the mere ammī abbā

tohfa dekh ke master jī kā

meri barahwen sal-girah par

sab ne nawaza tohfe de kar

abba ek cycle le aae

ammi ne laDDu banwae

didi ne kapDe silwae

bhayya gend aur balla lae

har ek kuchh na kuchh laya tha

ek tohfa tha master ji ka

master ji lae the khilauna

sab se alag sab se nirala

ek qatar mein tin the bandar

kya KHubi thi un ke andar

ek tha hath se aankhen munde

dusra munh par hath tha rakkhe

aur jo tisra bandar dekha

hath jo tha kanon par rakkha

master ji se puchha main ne

kaisa khilauna hai kya jaane

kahne lage lo ghaur se sun lo

pahle sun lo phir munh kholo

ek kahta hai bura na dekho

dusra bole bura na bolo

aur tisre ka ye hai kahna

bura kisi se kabhi na sunna

kyun bhai kaisa hai ye tohfa

hai ki nahin ye sab ki pasand ka

master ji ki baaten sun kar

mili nasihat sal-girah par

KHush the mere ammi abba

tohfa dekh ke master ji ka