saman diwali ka

har ik makāñ meñ jalā phir diyā divālī kā

har ik taraf ko ujālā huā divālī kā

sabhī ke dil meñ samāñ bhā gayā divālī kā

kisī ke dil ko mazā ḳhush lagā dīvālī kā

ajab bahār kā hai din banā divālī kā

jahāñ meñ yaaro ajab tarah kā hai ye tyauhār

kisī ne naqd liyā aur koī kare hai udhār

khilaune kheloñ batāshoñ kā garm hai bāzār

har ik dukāñ meñ charāġhoñ kī ho rahī hai bahār

sabhoñ ko fikr hai ab jā-ba-jā divālī kā

miThā.iyoñ kī dukāneñ lagā ke halvā.ī

pukārte haiñ ki ''lā laa! divālī hai ā.ī''

batāshe le koī barfī kisī ne tulvā.ī

khilaune vāloñ kī in se ziyāda bin aa.ī

goyā unhoñ ke vaañ raaj aa gayā divālī kā

siraf harām kī kauḌī kā jin kā hai bevpār

unhoñ ne khāyā hai is din ke vāste hai udhār

kahe hai hañs ke qaraz-ḳhvāh se har ik ik baar

divālī aa.ī hai sab de dilā.eñge ai yaar

ḳhudā ke fazl se hai aasrā divālī kā

makān lep ke Thaliyā jo korī rakhavā.ī

jalā charāġh ko kauḌī vo jald jhankā.ī

asal juārī the un meñ to jaan sī aa.ī

ḳhushī se kuud uchhal kar pukāre o bhaa.ī

shugūn pahle karo tum zarā divālī kā

shagun kī baazī lagī pahle yaar ganDe kī

phir us se baḌh ke lagī tiin chaar ganDe kī

phirī jo aisī tarah baar baar ganDe kī

to aage lagne lagī phir hazār ganDe kī

kamāl nirḳh hai phir to lagā divālī kā

kisī ne ghar kī havelī giro rakhā haarī

jo kuchh thī jins mayassar banā banā haarī

kisī ne chiiz kisī kisī kī churā chhupā haarī

kisī ne gaThrī paḌosan kī apnī lā haarī

ye haar jiit kā charchā paḌā divālī kā

kisī ko daav pe lānakkī muuTh ne maarā

kisī ke ghar pe dharā soḳhta ne añgārā

kisī ko nard ne chaupaḌ ke kar diyā zaarā

lañgoTī bāñdh ke baiThā izaar tak haarā

ye shor aa ke machā jā-ba-jā divālī kā

kisī kī jorū kahe hai pukār ai phaḌve

bahū kī naughre beTe ke haath ke khaḌve

jo ghar meñ aave to sab mil kiye haiñ sau ghaḌve

nikal tū yaañ se tirā kaam yaañ nahīñ bhaḌve

ḳhudā ne tujh ko to shohdā kiyā divālī kā

vo us ke jhoñTe pakaḌ kar kahe hai māruñgā

tirā jo gahna hai sab taar taar utārūñgā

havelī apnī to ik daav par maiñ hārūñgā

ye sab to haarā huuñ ḳhandī tujh bhī hārūñgā

chaḌhā hai mujh ko bhī ab to nashā divālī kā

tujhe ḳhabar nahīñ ḳhandī ye lat vo pyārī hai

kisī zamāne meñ aage huā jo jvārī hai

to us ne jorū kī nath aur izaar utārī hai

izaar kyā hai ki jorū talak bhī haarī hai

sunā ye tū ne nahīñ mājrā divālī kā

jahāñ meñ ye jo dīvālī kī sair hotī hai

to zar se hotī hai aur zar baġhair hotī hai

jo haare un pe ḳharābī kī fair hotī hai

aur un meñ aan ke jin jin kī ḳhair hotī hai

to aaḌe aatā hai un ke diyā divālī kā

ye bāteñ sach haiñ na jhuuT un ko jāniyo yāro!

nasīhateñ haiñ unheñ dil se māniyo yāro!

jahāñ ko jaao ye qissa bakhāniyo yāro!

jo jvārī ho na burā us kā māniyo yaaro

'nazīr' aap bhī hai jvāriyā dīvālī kā

har ek makan mein jala phir diya diwali ka

har ek taraf ko ujala hua diwali ka

sabhi ke dil mein saman bha gaya diwali ka

kisi ke dil ko maza KHush laga diwali ka

ajab bahaar ka hai din bana diwali ka

jahan mein yaro ajab tarah ka hai ye tyauhaar

kisi ne naqd liya aur koi kare hai udhaar

khilaune khelon batashon ka garm hai bazar

har ek dukan mein charaghon ki ho rahi hai bahaar

sabhon ko fikr hai ab ja-ba-ja diwali ka

miThaiyon ki dukanen laga ke halwai

pukarte hain ki la la! diwali hai aai

batashe le koi barfi kisi ne tulwai

khilaune walon ki in se ziyaada bin aai

goya unhon ke wan raj aa gaya diwali ka

siraf haram ki kauDi ka jin ka hai bewpar

unhon ne khaya hai is din ke waste hai udhaar

kahe hai hans ke qaraz-KHwah se har ek ek bar

diwali aai hai sab de dilaenge ai yar

KHuda ke fazl se hai aasra diwali ka

makan lep ke Thaliya jo kori rakhawai

jala charagh ko kauDi wo jald jhankai

asal juari the un mein to jaan si aai

KHushi se kud uchhal kar pukare o bhai

shugun pahle karo tum zara diwali ka

shagun ki bazi lagi pahle yar ganDe ki

phir us se baDh ke lagi tin chaar ganDe ki

phiri jo aisi tarah bar bar ganDe ki

to aage lagne lagi phir hazar ganDe ki

kamal nirKH hai phir to laga diwali ka

kisi ne ghar ki haweli giro rakha haari

jo kuchh thi jins mayassar bana bana haari

kisi ne chiz kisi kisi ki chura chhupa haari

kisi ne gaThri paDosan ki apni la haari

ye haar jit ka charcha paDa diwali ka

kisi ko daw pe lanakki muTh ne mara

kisi ke ghar pe dhara soKHta ne angara

kisi ko nard ne chaupaD ke kar diya zara

langoTi bandh ke baiTha izar tak haara

ye shor aa ke macha ja-ba-ja diwali ka

kisi ki joru kahe hai pukar ai phaDwe

bahu ki naughre beTe ke hath ke khaDwe

jo ghar mein aawe to sab mil kiye hain sau ghaDwe

nikal tu yan se tera kaam yan nahin bhaDwe

KHuda ne tujh ko to shohda kiya diwali ka

wo us ke jhonTe pakaD kar kahe hai marunga

tera jo gahna hai sab tar tar utarunga

haweli apni to ek daw par main haarunga

ye sab to haara hun KHandi tujh bhi haarunga

chaDha hai mujh ko bhi ab to nasha diwali ka

tujhe KHabar nahin KHandi ye lat wo pyari hai

kisi zamane mein aage hua jo jwari hai

to us ne joru ki nath aur izar utari hai

izar kya hai ki joru talak bhi haari hai

suna ye tu ne nahin majra diwali ka

jahan mein ye jo diwali ki sair hoti hai

to zar se hoti hai aur zar baghair hoti hai

jo haare un pe KHarabi ki fair hoti hai

aur un mein aan ke jin jin ki KHair hoti hai

to aaDe aata hai un ke diya diwali ka

ye baaten sach hain na jhuT un ko jaaniyo yaro!

nasihaten hain unhen dil se maniyo yaro!

jahan ko jao ye qissa bakhaniyo yaro!

jo jwari ho na bura us ka maniyo yaro

'nazir' aap bhi hai jwariya diwali ka