sanp

ye saañp aaj jo phan uThā.e

mire rāste meñ khaḌā hai

paḌā thā qadam chāñd par merā jis din

usī din ise maar Daalā thā maiñ ne

ukhāḌe the sab daañt kuchlā thā sar bhī

maroḌī thī dum toḌ dī thī kamar bhī

magar chāñd se jhuk ke dekhā jo maiñ ne

to dum is kī hilne lagī thī

ye kuchh reñgne bhī lagā thā

ye kuchh reñgtā kuchh ghisaTtā huā

purāne shivāle kī jānib chalā

jahāñ duudh is ko pilāyā gayā

paḌhe panditoñ ne ka.ī mantar aise

ye kam-baḳht phir se jilāyā gayā

shivāle se niklā vo phunkārtā

rag-e-arz par Dañk sā mārtā

baḌhā maiñ ki ik baar phir sar kuchal duuñ

ise bhārī qadmoñ se apne masal duuñ

qarīb ek vīrān masjid thii, masjid meñ

ye jā chhupā

jahāñ is ko petrol se ġhusl de kar

hasīn ek ta.avīz gardan meñ Daalā gayā

huā jitnā sadiyoñ meñ insāñ buland

ye kuchh us se ūñchā uchhālā gayā

uchhal ke ye girjā kī dahlīz par jā girā

jahāñ is ko sone kī kechul pahnā.ī ga.ī

salīb ek chāñdī kī siine pe us ke sajā.ī ga.ī

diyā jis ne duniyā ko paiġhām-e-amn

usī ke hayāt-āfrīñ naam par

use jañg-bāzī sikhā.ī ga.ī

bamoñ kā gulū-band gardan meñ Daalā

aur is dhaj se maidāñ meñ us ko nikālā

paḌā us kā dhartī pe saaya

to dhartī kī raftār rukne lagī

añdherā añdherā zamīñ se

falak tak añdherā

jabīñ chāñd tāroñ kī jhukne lagī

huī jab se science zar kī mutī.a

jo thā alam kā e'tibār uTh gayā

aur is saañp ko zindagī mil ga.ī

ise ham ne zahhāk ke bhārī kāñdhe pe dekhā thā ik din

ye hindū nahīñ hai musalmāñ nahīñ

ye donoñ kā maġhz aur ḳhuuñ chāTtā hai

bane jab ye hindū musalmān insāñ

usī din ye kam-baḳht mar jā.egā

ye sanp aaj jo phan uThae

mere raste mein khaDa hai

paDa tha qadam chand par mera jis din

usi din ise mar Dala tha main ne

ukhaDe the sab dant kuchla tha sar bhi

maroDi thi dum toD di thi kamar bhi

magar chand se jhuk ke dekha jo main ne

to dum is ki hilne lagi thi

ye kuchh rengne bhi laga tha

ye kuchh rengta kuchh ghisaTta hua

purane shiwale ki jaanib chala

jahan dudh is ko pilaya gaya

paDhe panditon ne kai mantar aise

ye kam-baKHt phir se jilaya gaya

shiwale se nikla wo phunkarta

rag-e-arz par Dank sa marta

baDha main ki ek bar phir sar kuchal dun

ise bhaari qadmon se apne masal dun

qarib ek viran masjid thi, masjid mein

ye ja chhupa

jahan is ko petrol se ghusl de kar

hasin ek tawiz gardan mein Dala gaya

hua jitna sadiyon mein insan buland

ye kuchh us se uncha uchhaala gaya

uchhal ke ye girja ki dahliz par ja gira

jahan is ko sone ki kechul pahnai gai

salib ek chandi ki sine pe us ke sajai gai

diya jis ne duniya ko paigham-e-amn

usi ke hayat-afrin nam par

use jang-bazi sikhai gai

bamon ka gulu-band gardan mein Dala

aur is dhaj se maidan mein us ko nikala

paDa us ka dharti pe saya

to dharti ki raftar rukne lagi

andhera andhera zamin se

falak tak andhera

jabin chand taron ki jhukne lagi

hui jab se science zar ki mutia

jo tha alam ka e'tibar uTh gaya

aur is sanp ko zindagi mil gai

ise hum ne zahhak ke bhaari kandhe pe dekha tha ek din

ye hindu nahin hai musalman nahin

ye donon ka maghz aur KHun chaTta hai

bane jab ye hindu musalman insan

usi din ye kam-baKHt mar jaega