sanwli

sāñvle jism kī har qaus meñ lahrātā hai

muskurātī huī shāmoñ kā salonā jaadū

raqs kartī hai tire husn kī ra.anā.ī meñ

vādī-e-najd ke jhoñkoñ kī lajīlī ḳhushbū

ye tire dosh pe bal khā ke bikhartī zulfeñ

jaise ma.abad meñ sulagte hue sandal kā dhuāñ

jaise maġhmūm musavvir ke siyah-posh ḳhayāl

jaise mauhūm jazīroñ kī chhabelī pariyāñ

tū vo barsāt kī ghanghor ghaTā hai jis meñ

ek kaifiyat naġhmāt chhupī baiThī hai

dūdhiyā husn se uktā ke mirī nazroñ ne

jab bhī dekhā hai tire rañg kā bharpūr nikhār

guuñj uThī zehn meñ uḌte hue bhañvaroñ kī sadā

rach ga.ī ruuh meñ gaatī huī koyal kī pukār

kaun hai jis ne tirā zikr na chheḌā ho kabhī

ab to har bazm kā hai ek hī mauzū-e-suḳhan

koī detā hai laqab laila-e-be-mahmil kā

koī kahtā hai tujhe pyaar se kaalī nāgin

kaun sā lafz tire vāste ījād karūñ

sochtā huuñ tujhe kis naam se maiñ yaad karūñ

sanwle jism ki har qaus mein lahraata hai

muskuraati hui shamon ka salona jadu

raqs karti hai tere husn ki ranai mein

wadi-e-najd ke jhonkon ki lajili KHushbu

ye tere dosh pe bal kha ke bikharti zulfen

jaise mabad mein sulagte hue sandal ka dhuan

jaise maghmum musawwir ke siyah-posh KHayal

jaise mauhum jaziron ki chhabeli pariyan

tu wo barsat ki ghanghor ghaTa hai jis mein

ek kaifiyat naghmat chhupi baiThi hai

dudhiya husn se ukta ke meri nazron ne

jab bhi dekha hai tere rang ka bharpur nikhaar

gunj uThi zehn mein uDte hue bhanwaron ki sada

rach gai ruh mein gati hui koyal ki pukar

kaun hai jis ne tera zikr na chheDa ho kabhi

ab to har bazm ka hai ek hi mauzu-e-suKHan

koi deta hai laqab laila-e-be-mahmil ka

koi kahta hai tujhe pyar se kali nagin

kaun sa lafz tere waste ijad karun

sochta hun tujhe kis nam se main yaad karun