saya-e-diwar

kaisā sunsān hai dasht-e-āvārgī

har taraf dhuup hai har taraf tishnagī

kaisī be-jān hai mai-kade kī fazā

jism kī sansanī ruuh kī ḳhastagī

is do-rāhe pe kho.e ga.e hausle

is añdhere meñ gum ho ga.ī zindagī

ai ġham-e-ārzū maiñ bahut thak gayā

mujh ko de de vahī merī apnī galī

chhoTā-moTā magar ḳhūb-sūrat sā ghar

ghar ke āñgan meñ ḳhushbū sī phailī huī

muñh dhulātī savere kī pahlī kiran

sā.ebāñ par amar-bel mahkī huī

khiḌkiyoñ par havāoñ kī aTkheliyāñ

rauzan-e-dar se chhantī huī raushnī

shaam ko halkā halkā uThtā dhuāñ

paas chūlhe ke baiThī huī lakshmī

ik añgīThī meñ ko.ele dahakte hue

bartanoñ kī suhānī madhur rāgnī

ras-bhare giit ma.asūm se qahqahe

raat ko chhat pe chhiTkī huī chāñdnī

sub.h ko apne schōl jaate hue

mere nanhe ke chehre pe ik tāzgī

rishte-nāte mulāqāteñ mehmāniyāñ

dāvateñ jashn tyauhār shādī ġhamī

jī meñ hai apnī āzādiyāñ bech kar

aaj le luuñ ye pābandiyoñ kī ḳhushī

kaisa sunsan hai dasht-e-awargi

har taraf dhup hai har taraf tishnagi

kaisi be-jaan hai mai-kade ki faza

jism ki sansani ruh ki KHastagi

is do-rahe pe khoe gae hausle

is andhere mein gum ho gai zindagi

ai gham-e-arzu main bahut thak gaya

mujh ko de de wahi meri apni gali

chhoTa-moTa magar KHub-surat sa ghar

ghar ke aangan mein KHushbu si phaili hui

munh dhulati sawere ki pahli kiran

saeban par amar-bel mahki hui

khiDkiyon par hawaon ki aTkheliyan

rauzan-e-dar se chhanti hui raushni

sham ko halka halka uThta dhuan

pas chulhe ke baiThi hui lakshmi

ek angiThi mein koele dahakte hue

bartanon ki suhani madhur ragni

ras-bhare git masum se qahqahe

raat ko chhat pe chhiTki hui chandni

subh ko apne school jate hue

mere nanhe ke chehre pe ek tazgi

rishte-nate mulaqaten mehmaniyan

dawaten jashn tyauhaar shadi ghami

ji mein hai apni aazadiyan bech kar

aaj le lun ye pabandiyon ki KHushi