sabza-e-begana

hasab-nasab hai na tārīḳh o jā-e-paidā.ish

kahāñ se aayā thā maz.hab na valdiyat ma.alūm

maqāmī chhoTe se ḳhairātī aspatāl meñ vo

kahīñ se laayā gayā thā vahāñ ye hai marqūm

marīz rātoñ ko chillātā hai ''mire andar

asiir zaḳhmī parinda hai ik, nikālo ise

gulū-girafta hai ye habs-e-dam hai ḳhā.if hai

sitam-rasīda hai mazlūm hai bachā lo ise''

marīz chīḳhtā hai dard se karāhtā hai

ye vietnam, kabhī dominican, kabhī kashmīr

zar-e-kasīr, siyah qaumeñ, ḳhaam madniyāt

kasīf tel ke chashme, avām, istehsāl

zamīñ kī maut bahā.im, fizā.ī jañg, sitam

ijāra-dārī, subuk gaam, dilrubā, atfāl

sarod-o-naġhma, adab, sher, amn, barbādī

janāza ishq kaa, daf kī sadā.eñ, murda ḳhayāl

taraqqī, ilm ke gahvāre, ruuh kā madfan

ḳhudā kā qatl, ayaañ zer-e-nāf zohra jamāl

tamām raat ye be-rabt bāteñ kartā hai

marīz saḳht pareshānī kā sabab hai yahāñ

ġharaz ki jo thā shikāyat kā ek daftar thā

natīja ye hai usī roz muntaqil karke

use ik aur shifā-ḳhāne ko ravāna kiyā

sunā gayā hai vahāñ nafsiyāt ke māhir

tabīb hāziq o nabbāz doctor kitne

talab kiye ga.e aur sab ne ittifāq kiyā

ye koī zehnī maraz hai, marīz ne shāyad

kabhī parinda koī paalā hogā lekin vo

adam-e-tavajjohī yā ittifāq se yūñhī

bichāra mar gayā us maut kā asar hai ye

ajiib chiiz hai taht-e-shu.ūr insāñ kā

ye aur kuchh nahīñ ehsās-e-jurm hai jis ne

dil o dimāġh pe qabza kiyā hai is darja

marīz qātil o mujrim samajhtā hai ḳhud ko!

kisī kī raa.e thī pasmāñda qaum kā ik fard

marīz hogā isī vāste siyah qaumeñ

ġharīb ke liye ik tabō ban ga.iiñ afsos

koī ye kahtā thā ye asal meñ hai hubb-e-vatan

marīz chāhtā thā ham kafīl hoñ apne

kisī bhī qaum ke aage na haath phailā.eñ

yahīñ pe tel ke chashme haiñ, vo kareñ daryāft!

gumān kuchh ko thā ye shaḳhs koī shā.er hai

jo chāhtā thā jahāñ-gardī meñ guzāre vaqt

hasīn aurteñ maa.il hoñ lutf-o-aish rahe

qalam ke zor se shohrat mile zamāne meñ

zar-e-kasīr bhī haath aa.e is bahāne se

magar ġharīb kī sab koshisheñ ga.iiñ nākām

shikast-e-paiham o ehsās-e-nā-rasā.ī ne

ye haal kar diyā majrūh hoga.e a.asāb

ġharaz ki nukta-rassī meñ guzar gayā sab vaqt

vo chīḳhtā hī rahā dard kī davā na milī

nashist ba.ad nashist aur muā.ene shab o roz

inhīñ meñ vaqt guzartā gayā shifā na milī

phir ek shaam vahāñ surma-dar-gulū aa.ī

jo us ke vāste goyā tabīb-e-hāziq thī

kisī ne phir na sunī dard se bharī āvāz

karāhtā thā jo ḳhāmosh ho gayā vo saaz

baras guzar ga.e is vāqi.e ko, maazī kī

añdherī god ne kab kā chhipā liyā us ko

magar sunā hai shifā-ḳhāne ke dar-o-dīvār

vo gird-o-pesh jahāñ se kabhī vo guzrā thā

ḳharābe bastiyāñ jañgal, ujaaḌ rāh-guzār

usī kī chīḳh ko dohrā.e jā rahe haiñ abhī

''koī mudāvā karo zālimo mire andar

asiir zaḳhmī parinda hai ik nikālo ise

gulū-girafta hai ye habs-e-dam hai ḳhā.if hai

sitam-rasīda hai mazlūm hai bachā lo ise''

hasab-nasab hai na tariKH o ja-e-paidaish

kahan se aaya tha mazhab na waldiyat malum

maqami chhoTe se KHairaati aspatal mein wo

kahin se laya gaya tha wahan ye hai marqum

mariz raaton ko chillata hai mire andar

asir zaKHmi parinda hai ik, nikalo ise

gulu-girafta hai ye habs-e-dam hai KHaif hai

sitam-rasida hai mazlum hai bacha lo ise

mariz chiKHta hai dard se karahta hai

ye wietnam, kabhi dominican, kabhi kashmir

zar-e-kasir, siyah qaumen, KHam madniyat

kasif tel ke chashme, awam, istehsal

zamin ki maut bahaim, fizai jang, sitam

ijara-dari, subuk gam, dilruba, atfal

sarod-o-naghma, adab, sher, amn, barbaadi

janaza ishq ka, daf ki sadaen, murda KHayal

taraqqi, ilm ke gahware, ruh ka madfan

KHuda ka qatl, ayan zer-e-naf zohra jamal

tamam raat ye be-rabt baaten karta hai

mariz saKHt pareshani ka sabab hai yahan

gharaz ki jo tha shikayat ka ek daftar tha

natija ye hai usi roz muntaqil karke

use ek aur shifa-KHane ko rawana kiya

suna gaya hai wahan nafsiyat ke mahir

tabib haziq o nabbaz doctor kitne

talab kiye gae aur sab ne ittifaq kiya

ye koi zehni maraz hai, mariz ne shayad

kabhi parinda koi pala hoga lekin wo

adam-e-tawajjohi ya ittifaq se yunhi

bichaara mar gaya us maut ka asar hai ye

ajib chiz hai taht-e-shuur insan ka

ye aur kuchh nahin ehsas-e-jurm hai jis ne

dil o dimagh pe qabza kiya hai is darja

mariz qatil o mujrim samajhta hai KHud ko!

kisi ki rae thi pasmanda qaum ka ek fard

mariz hoga isi waste siyah qaumen

gharib ke liye ek taboo ban gain afsos

koi ye kahta tha ye asal mein hai hubb-e-watan

mariz chahta tha hum kafil hon apne

kisi bhi qaum ke aage na hath phailaen

yahin pe tel ke chashme hain, wo karen daryaft!

guman kuchh ko tha ye shaKHs koi shaer hai

jo chahta tha jahan-gardi mein guzare waqt

hasin aurten mail hon lutf-o-aish rahe

qalam ke zor se shohrat mile zamane mein

zar-e-kasir bhi hath aae is bahane se

magar gharib ki sab koshishen gain nakaam

shikast-e-paiham o ehsas-e-na-rasai ne

ye haal kar diya majruh hogae aasab

gharaz ki nukta-rassi mein guzar gaya sab waqt

wo chiKHta hi raha dard ki dawa na mili

nashist baad nashist aur muaene shab o roz

inhin mein waqt guzarta gaya shifa na mili

phir ek sham wahan surma-dar-gulu aai

jo us ke waste goya tabib-e-haziq thi

kisi ne phir na suni dard se bhari aawaz

karahta tha jo KHamosh ho gaya wo saz

baras guzar gae is waqie ko, mazi ki

andheri god ne kab ka chhipa liya us ko

magar suna hai shifa-KHane ke dar-o-diwar

wo gird-o-pesh jahan se kabhi wo guzra tha

KHarabe bastiyan jangal, ujaD rah-guzar

usi ki chiKH ko dohrae ja rahe hain abhi

koi mudawa karo zalimo mere andar

asir zaKHmi parinda hai ek nikalo ise

gulu-girafta hai ye habs-e-dam hai KHaif hai

sitam-rasida hai mazlum hai bacha lo ise