sachchi baaton se khaDe sarkar ke hote hain kan

sachchī bātoñ se khaḌe sarkār ke hote haiñ kaan

dhīre dhīre boliye dīvār ke hote haiñ kaan

dījiye mujh ko sazā paiġhāmbar kā kyā qusūr

garm kyoñ us mujrim-e-guftār ke hote haiñ kaan

baaġh meñ ġhuncha jo chaTkā maiñ ḳhushī se phuul uThā

āshnā kitne sadā-e-yār ke hote haiñ kaan

mai-kade meñ kyoñ na ḳhālī jaa.e phir vaa.iz kī baat

jab bhare pahle se har mai-ḳhvār ke hote haiñ kaan

daaġh siine ke na dikhlā nāla-e-pur-shor kar

muñh pe āñkhoñ kī jagah sarkār ke hote haiñ kaan

pūchhtā 'fārūq' shaiḳh-e-madrasa miltā agar

band kyā har sāhab-e-dastār ke hote haiñ kaan

sachchi baaton se khaDe sarkar ke hote hain kan

dhire dhire boliye diwar ke hote hain kan

dijiye mujh ko saza paighambar ka kya qusur

garm kyon us mujrim-e-guftar ke hote hain kan

bagh mein ghuncha jo chaTka main KHushi se phul uTha

aashna kitne sada-e-yar ke hote hain kan

mai-kade mein kyon na KHali jae phir waiz ki baat

jab bhare pahle se har mai-KHwar ke hote hain kan

dagh sine ke na dikhla nala-e-pur-shor kar

munh pe aankhon ki jagah sarkar ke hote hain kan

puchhta 'faruq' shaiKH-e-madrasa milta agar

band kya har sahab-e-dastar ke hote hain kan