saDak

saḌak masāfat kī ujlatoñ meñ

ghire hue sab musāfiroñ ko

ba-ġhaur fursat se dekhtī hai

kisī ke chehre pe surḳh vahshat chamak rahī hai

kisī ke chehre se zard hairat chhalak rahī hai

kisī kī āñkheñ harī-bharī haiñ

kabīr had se ubhar rahā hai

saġhīr qad se guzar rahā hai

kisī kā tyre kisī ke pahiye ko khā rahā hai

kisī kā juutā kisī kī chappal chabā rahā hai

kisī ke pairoñ meñ aa rahā hai kisī kā bachcha

kisī kā bachcha kisī ke shāne pe jā rahā hai

koī Thikāne pe koī khāne pe jā rahā hai

habīb dast-e-raqīb thāme

ġharīb-ḳhāne pe jā rahā hai

amiir piñjra banā rahā hai

ġhulām kartab dikhā rahā hai

aur apne beTe ke saath chhat par

amiin kunDā lagā rahā hai

nizām Tāñga chalā rahā hai

kisī kalā.ī pe jagmagātī huī ghaḌī hai

magar abhī vo rukī huī hai

kisī ke chehre pe baara bajne meñ pāñch second rah ga.e haiñ

kisī kī hāthī-numā prado

saḌak se aise guzar rahī hai

sivā.e is ke kahīñ bhī jaise koī nahīñ ho

kisī kī moñchheñ jhukī huī haiñ

kisī kī bāñchheñ khilī huī haiñ

kisī kī taxi kisī kī foksī milī huī haiñ

kisī ke lab aur kisī kī āñkheñ silī huī haiñ

kisī ke kapḌe phaTe hue haiñ

kisī kī pagḌī chamak rahī hai

kisī kī rañgat kisī kī Topī uḌī huī hai

sharīf nazreñ uThā uThā kar

kamān jismoñ pe apnī vahshat ke tiir kab se chalā rahā hai

nazīr nazreñ churā rahā hai

nafīs apne cluff kī shiknoñ ko ro rahā hai

hakīm apne matab ke shīshoñ ko dho rahā hai

kisī kī āñkhoñ ke dhuñdle shīshoñ meñ us ke maazī kī jhalkiyāñ haiñ

kisī kī āñkhoñ meñ aane vaale hasīn lamhoñ kī mastiyāñ haiñ

kisī kī āñkhoñ meñ rat-jagoñ kī kuchh arġhavānī sī Doriyāñ haiñ

kisī ke kāñdhe pe us ke ḳhvāboñ kī boriyāñ haiñ

kabāḌ-ḳhāne pe baasī TukḌoñ kī or kitāboñ kī boriyāñ haiñ

buzurg bargad ke nīche būḌhā khaḌā huā hai

aur us ke hāthoñ meñ tape lipTī huī chhaḌī hai

police kī gaaḌī pikiT lagā kar

saḌak pe tirchhī khaḌī huī hai

aur ek mazdūr apnā dāman uThā.e be-bas khaḌā huā hai

aur ik sipāhī ki us ke nefe meñ uñgliyoñ ko ghumā rahā hai

vahīñ pe shāhid siyāh chashma lagā ke ḳhud ko chhupā rahā hai

news channel kī chhoTī gaaḌī baḌī ḳhabar kī talāsh meñ hai

do sabzī vaale bhī apnī pherī lagā rahe haiñ

to phuul vaale ke sar pe phūloñ kī Tokarī hai

kisī kī āñkhoñ meñ naukrī hai

kisī kī āñkhoñ meñ chhokrī hai

vaqār sar ko jhukā rahā hai

farāz khaa.ī meñ jā rahā hai

to giilī cigarette ke kash lagā kar

navāb rickshaw chalā rahā hai

salīm kannī ghumā rahā hai

vakīl vardī meñ jā rahā hai

zamīr baġhleñ bajā rahā hai

aur ek vaa.iz batā rahā hai

ḳhudā ko nārāz karne vaale jahannamī haiñ

ḳhudā ko raazī karo ḳhudārā

ḳhudā ko raazī karo ḳhudārā

aur us ke aage nasīr akmal kamāl shādāb ġhulām saare

nazar jhukā.e khaḌe hue haiñ

ki chashm-e-bīnā agar kahīñ hai

to samjho pātāl tak gaḌhī hai

kisī ko a-c ḳharīdnā hai

kisī ko pī sī ḳharīdnā hai

kisī kī bas aur kisī kī bī-sī nikal rahī hai

aqīla ḳhāla ke donoñ hāthoñ meñ aaTh thaile laTak rahe haiñ

aur aate jaate sabhī musāfir

unheñ musalsal khaTak rahe haiñ

ziyā añdhere meñ jā rahā hai

gulāb kachrā jalā rahā hai

aziim makkhī aḌā rahā hai

kalīm guTkā chabā rahā hai

to ghanTa-package pe jaane kab se

fahīm gappeñ laḌā rahā hai

sabaq musāvāt kā sikhāne

vazīr gaaḌī meñ jā rahā hai

sanā nidā ko na.e latīfe sunā rahī hai

hinā hathelī ko takte takte purāne raste se aa rahī hai

aur apnī bhāvaj kā haath thāme

zubaida check-up ko jā rahī hai

vo apnī nazreñ kabhī idhar ko kabhī adhar ko gumā rahī hai

magar koī shai use musalsal bulā rahī rahī hai

ajiib ujlat ajiib vahshat ajiib ġhaflat kā mājrā hai

kahūñ maiñ kis se mire ḳhudāyā ye kaisī ḳhilqat kā mājrā hai

ki apnī mastī meñ mast ho kar

ye sab musāfir guzar rahe

na.e musāfir ubhar rahe haiñ

saḌak jahāñ thī vahīñ khaḌī hai

magar haqīqat bahut baḌī hai

saḌak pe billī marī paḌī hai

saDak masafat ki ujlaton mein

ghire hue sab musafiron ko

ba-ghaur fursat se dekhti hai

kisi ke chehre pe surKH wahshat chamak rahi hai

kisi ke chehre se zard hairat chhalak rahi hai

kisi ki aankhen hari-bhari hain

kabir had se ubhar raha hai

saghir qad se guzar raha hai

kisi ka tyre kisi ke pahiye ko kha raha hai

kisi ka juta kisi ki chappal chaba raha hai

kisi ke pairon mein aa raha hai kisi ka bachcha

kisi ka bachcha kisi ke shane pe ja raha hai

koi Thikane pe koi khane pe ja raha hai

habib dast-e-raqib thame

gharib-KHane pe ja raha hai

amir pinjra bana raha hai

ghulam kartab dikha raha hai

aur apne beTe ke sath chhat par

amin kunDa laga raha hai

nizam Tanga chala raha hai

kisi kalai pe jagmagati hui ghaDi hai

magar abhi wo ruki hui hai

kisi ke chehre pe bara bajne mein panch second rah gae hain

kisi ki hathi-numa prado

saDak se aise guzar rahi hai

siwae is ke kahin bhi jaise koi nahin ho

kisi ki monchhen jhuki hui hain

kisi ki banchhen khili hui hain

kisi ki taxi kisi ki foksi mili hui hain

kisi ke lab aur kisi ki aankhen sili hui hain

kisi ke kapDe phaTe hue hain

kisi ki pagDi chamak rahi hai

kisi ki rangat kisi ki Topi uDi hui hai

sharif nazren uTha uTha kar

kaman jismon pe apni wahshat ke tir kab se chala raha hai

nazir nazren chura raha hai

nafis apne cluff ki shiknon ko ro raha hai

hakim apne matab ke shishon ko dho raha hai

kisi ki aankhon ke dhundle shishon mein us ke mazi ki jhalkiyan hain

kisi ki aankhon mein aane wale hasin lamhon ki mastiyan hain

kisi ki aankhon mein rat-jagon ki kuchh arghawani si Doriyan hain

kisi ke kandhe pe us ke KHwabon ki boriyan hain

kabaD-KHane pe basi TukDon ki or kitabon ki boriyan hain

buzurg bargad ke niche buDha khaDa hua hai

aur us ke hathon mein tape lipTi hui chhaDi hai

police ki gaDi pikiT laga kar

saDak pe tirchhi khaDi hui hai

aur ek mazdur apna daman uThae be-bas khaDa hua hai

aur ek sipahi ki us ke nefe mein ungliyon ko ghuma raha hai

wahin pe shahid siyah chashma laga ke KHud ko chhupa raha hai

news channel ki chhoTi gaDi baDi KHabar ki talash mein hai

do sabzi wale bhi apni pheri laga rahe hain

to phul wale ke sar pe phulon ki Tokari hai

kisi ki aankhon mein naukri hai

kisi ki aankhon mein chhokri hai

waqar sar ko jhuka raha hai

faraaz khai mein ja raha hai

to gili cigarette ke kash laga kar

nawab rickshaw chala raha hai

salim kanni ghuma raha hai

wakil wardi mein ja raha hai

zamir baghlen baja raha hai

aur ek waiz bata raha hai

KHuda ko naraaz karne wale jahannami hain

KHuda ko raazi karo KHudara

KHuda ko raazi karo KHudara

aur us ke aage nasir akmal kamal shadab ghulam sare

nazar jhukae khaDe hue hain

ki chashm-e-bina agar kahin hai

to samjho patal tak gaDhi hai

kisi ko a-c KHaridna hai

kisi ko pi si KHaridna hai

kisi ki bas aur kisi ki bi-si nikal rahi hai

aqila KHala ke donon hathon mein aaTh thaile laTak rahe hain

aur aate jate sabhi musafir

unhen musalsal khaTak rahe hain

ziya andhere mein ja raha hai

gulab kachra jala raha hai

azim makkhi aDa raha hai

kalim guTka chaba raha hai

to ghanTa-package pe jaane kab se

fahim gappen laDa raha hai

sabaq musawat ka sikhane

wazir gaDi mein ja raha hai

sana nida ko nae latife suna rahi hai

hina hatheli ko takte takte purane raste se aa rahi hai

aur apni bhawaj ka hath thame

zubaida check-up ko ja rahi hai

wo apni nazren kabhi idhar ko kabhi adhar ko guma rahi hai

magar koi shai use musalsal bula rahi rahi hai

ajib ujlat ajib wahshat ajib ghaflat ka majra hai

kahun main kis se mere KHudaya ye kaisi KHilqat ka majra hai

ki apni masti mein mast ho kar

ye sab musafir guzar rahe

nae musafir ubhar rahe hain

saDak jahan thi wahin khaDi hai

magar haqiqat bahut baDi hai

saDak pe billi mari paDi hai