safar

āvāzeñ raat kī ḳhāmoshī meñ ojhal hone kā sandesa laa.ī haiñ

chāñd ke aadhe TukḌe par kuchh ḳhvāboñ kī tadfīn huī hai

ghaḌe kā paanī qatra-qatra Dol rahā hai

dīvāroñ kī miTTī meñ barsoñ se gūñdhī kuchh poroñ kā lams achānak

qalb-kade meñ chīḳh paḌā hai

raat ke kaale tave par vahshat kī roTī pakne ko tayyār paḌī hai

ghaḌī kī dīmak saañs kā nādīda darvāza chaaT rahī hai

maiñ yādoñ kī taḳhtī le kar

us par apne ghaghū ghoḌe

pariyāñ jugnū titlī guḌiyā bañTe mor ke par bosoñ kī toffē

aur harfoñ kā paak sahīfa

tasvīroñ meñ Dhaal rahā huuñ

kal aur aaj ke saare raste chal aayā huuñ

tanhā.ī ke chaurāhe par aan khaḌā huuñ

chāroñ jānib ashkoñ kī ik barf jamī hai

saañs thamī hai

aur mere hāthoñ se jaise

būḌhī uñglī chhūT rahī hai

aawazen raat ki KHamoshi mein ojhal hone ka sandesa lai hain

chand ke aadhe TukDe par kuchh KHwabon ki tadfin hui hai

ghaDe ka pani qatra-qatra Dol raha hai

diwaron ki miTTi mein barson se gundhi kuchh poron ka lams achanak

qalb-kade mein chiKH paDa hai

raat ke kale tawe par wahshat ki roTi pakne ko tayyar paDi hai

ghaDi ki dimak sans ka nadida darwaza chaT rahi hai

main yaadon ki taKHti le kar

us par apne ghaghu ghoDe

pariyan jugnu titli guDiya banTe mor ke par boson ki toffee

aur harfon ka pak sahifa

taswiron mein Dhaal raha hun

kal aur aaj ke sare raste chal aaya hun

tanhai ke chaurahe par aan khaDa hun

chaaron jaanib ashkon ki ek barf jami hai

sans thami hai

aur mere hathon se jaise

buDhi ungli chhuT rahi hai