safar aur musafir

hai kaThin bachcho ye jīvan kā safar

hai nihāyat pur-ḳhatar ik ik Dagar

rāhbar ke bhes meñ haiñ rāhzan

is safar kī haiñ fazā.eñ pur-fitan

āñdhiyāñ ġham kī uTheñgī har qadam

rakhnā apne hausloñ kā tum bharam

ġham ko sāñche meñ ḳhushī ke Dhālnā

har balā ko muskurā kar Tālnā

kārvāñ ko bhī parāyā māniye

is safar meñ ḳhud ko tanhā jāniye

thak ga.e hoñ to zarā sustā.iye

manziloñ kī samt phir baḌh jā.iye

chāhiye tum ko ḳhudī kī raushnī

hai musalsal ik safar ye zindagī

rahiye duniyā meñ musāfir kī tarah

dekhiye duniyā ko nāzir kī tarah

tum musāfir hī agar duniyā meñ ho

qadr bachcho vaqt kī karte raho

hote haiñ bachcho safar meñ tajarbe

log milte haiñ musāfir ko na.e

ik vasīla hai safar tafrīh kā

gūñjtī hai har taraf us kī sadā

ma.alūmāt afzā na ho kyuuñ kar safar

ho musāfir kī magar gahrī nazar

hai musāfir-ḳhāna ye duniyā suno

ham musāfir haiñ sabhī ai dosto

qaul tum apne buzurgoñ kā suno

is ke aamil ai mire bachcho bano

sub.h jaldī se safar par chal paḌo

shab se pahle ghar ko tum lauT aa.iyo

halkā kuchh sāmāñ safar meñ chāhiye

diid kā armāñ safar meñ chāhiye

zindagī meñ hai safar kā apnā rol

baḌhtā hai logoñ se bachcho mel-jol

in dinoñ apnā safar āsān hai

aur tayyāroñ pe apnā dhyān hai

tez hai apnī uḌānoñ kā asar

mintoñ meñ meloñ kā tai hogā safar

har musāfir ko safar se pyaar hai

azm kāmil ho to beḌā paar hai

rahtā hai 'hāfiz' safar meñ roz-o-shab

vo safar kā kartā hai dil se adab

hai kaThin bachcho ye jiwan ka safar

hai nihayat pur-KHatar ek ek Dagar

rahbar ke bhes mein hain rahzan

is safar ki hain fazaen pur-fitan

aandhiyan gham ki uThengi har qadam

rakhna apne hauslon ka tum bharam

gham ko sanche mein KHushi ke Dhaalna

har bala ko muskura kar Talna

karwan ko bhi paraya maniye

is safar mein KHud ko tanha jaaniye

thak gae hon to zara sustaiye

manzilon ki samt phir baDh jaiye

chahiye tum ko KHudi ki raushni

hai musalsal ek safar ye zindagi

rahiye duniya mein musafir ki tarah

dekhiye duniya ko nazir ki tarah

tum musafir hi agar duniya mein ho

qadr bachcho waqt ki karte raho

hote hain bachcho safar mein tajarbe

log milte hain musafir ko nae

ek wasila hai safar tafrih ka

gunjti hai har taraf us ki sada

malumat afza na ho kyun kar safar

ho musafir ki magar gahri nazar

hai musafir-KHana ye duniya suno

hum musafir hain sabhi ai dosto

qaul tum apne buzurgon ka suno

is ke aamil ai mere bachcho bano

subh jaldi se safar par chal paDo

shab se pahle ghar ko tum lauT aaiyo

halka kuchh saman safar mein chahiye

did ka arman safar mein chahiye

zindagi mein hai safar ka apna rol

baDhta hai logon se bachcho mel-jol

in dinon apna safar aasan hai

aur tayyaron pe apna dhyan hai

tez hai apni uDanon ka asar

minton mein melon ka tai hoga safar

har musafir ko safar se pyar hai

azm kaamil ho to beDa par hai

rahta hai 'hafiz' safar mein roz-o-shab

wo safar ka karta hai dil se adab