safar-e-aKHir-e-shab

bahut qarīb se aa.ī havā-e-dāman-e-gul

kisī ke rū-e-bahārīñ ne hāl-e-dil pūchhā

ki ai firāq kī rāteñ guzārne vaalo

ḳhumār-e-āḳhir-e-shab kā mizāj kaisā thā

tumhāre saath rahe kaun kaun se taare

siyāh raat meñ kis kis ne tum ko chhoḌ diyā

bichhaḌ ga.e ki daġhā de ga.e sharīk-e-safar

ulajh gayā ki vafā kā tilism TuuT gayā

nasīb ho gayā kis kis ko qurb-e-sultānī

mizāj kis kā yahāñ tak qalandarāna rahā

figār ho ga.e kāñToñ se pairahan kitne

zamīñ ko rashk-e-chaman kar gayā lahū kis kā

sunā.eñ yā na sunā.eñ hikāyat-e-shab-e-ġham

ki harf harf sahīfa hai, ashk ashk qalam

kin āñsuoñ se batā.eñ ki haal kaisā hai

bas is qadar hai ki jaise haiñ sarfarāz haiñ ham

satīza-kār rahe haiñ jahāñ bhī uljhe haiñ

shi.ār-e-rāh-e-zanāñ se musāfiroñ ke qadam

hazār dasht paḌe, laakh āftāb ubhre

jabīñ pe gard, palak par namī nahīñ aa.ī

kahāñ kahāñ na luTā kārvāñ faqīroñ kā

matā-e-dard meñ koī kamī nahīñ aa.ī

bahut qarib se aai hawa-e-daman-e-gul

kisi ke ru-e-bahaarin ne haal-e-dil puchha

ki ai firaq ki raaten guzarne walo

KHumar-e-aKHir-e-shab ka mizaj kaisa tha

tumhaare sath rahe kaun kaun se tare

siyah raat mein kis kis ne tum ko chhoD diya

bichhaD gae ki dagha de gae sharik-e-safar

ulajh gaya ki wafa ka tilism TuT gaya

nasib ho gaya kis kis ko qurb-e-sultani

mizaj kis ka yahan tak qalandarana raha

figar ho gae kanTon se pairahan kitne

zamin ko rashk-e-chaman kar gaya lahu kis ka

sunaen ya na sunaen hikayat-e-shab-e-gham

ki harf harf sahifa hai, ashk ashk qalam

kin aansuon se bataen ki haal kaisa hai

bas is qadar hai ki jaise hain sarfaraaz hain hum

satiza-kar rahe hain jahan bhi uljhe hain

shiar-e-rah-e-zanan se musafiron ke qadam

hazar dasht paDe, lakh aaftab ubhre

jabin pe gard, palak par nami nahin aai

kahan kahan na luTa karwan faqiron ka

mata-e-dard mein koi kami nahin aai