safar-e-na-tamam

zindagī kaun sī manzil pe rukī hai aa kar

aage chaltī bhī nahīñ

raah badaltī bhī nahīñ

sust-raftār hai ye daur-e-ubūrī kitnā

saḳht o be-jān hai vo paikar nuurī kitnā

chāñd ik ḳhvāb jo thā

shahr-e-ummīd tah-e-āb jo thā

husn ke māthe kā nanhā Tiikā

paa.e aadam ke tale aate hī

utre chehre kī tarah ho gayā kitnā phīkā

ham-junūñ kesh o tarah-dār hamesha ke jo the

bhāgte-sāyoñ ke pīchhe dauḌe

dāhne baa.eñ jo Dālīñ nazreñ

ho ke be-kaif haTā liiñ nazreñ

maut aflās jafā ayyārī

bhuut ifrīt chuḌeleñ ḳhvārī

nāchtī gaatī thiraktī hañstī

qahqahe gāliyāñ laḌtī Dastī

haDDiyāñ chūstī yarqān-zada lāshoñ kī

panjoñ meñ tār-e-kafan

shola dahan

bastī kī bastiyāñ jhulsātī huī

shahr pahuñchīñ to khule dar paa.e

chaḌh ga.iiñ sīḌhiyoñ par khaT khaT khaT

badan hone lage paT

le liyā dāñtoñ meñ shiryānoñ ko

vempā.er kī tarah

zindagī kaun sī manzil pe rukī hai aa kar

aage chaltī bhī nahīñ

raah badaltī bhī nahīñ

mas.ala ye hai ki ab is meñ pahal kaun kare

āsmāñ duur

zamīñ chuur

kahāñ jaa.e koī

kaash aise meñ chalā aa.e koī

dil-e-āshufta ko bahlā.e koī batlā.e koī

kis tarah phūTtī hai ḳhushk shajar meñ koñpal

zindagi kaun si manzil pe ruki hai aa kar

aage chalti bhi nahin

rah badalti bhi nahin

sust-raftar hai ye daur-e-uburi kitna

saKHt o be-jaan hai wo paikar nuri kitna

chand ek KHwab jo tha

shahr-e-ummid tah-e-ab jo tha

husn ke mathe ka nanha Tika

pae aadam ke tale aate hi

utre chehre ki tarah ho gaya kitna phika

ham-junun kesh o tarah-dar hamesha ke jo the

bhagte-sayon ke pichhe dauDe

dahne baen jo Dalin nazren

ho ke be-kaif haTa lin nazren

maut aflas jafa ayyari

bhut ifrit chuDelen KHwari

nachti gati thirakti hansti

qahqahe galiyan laDti Dasti

haDDiyan chusti yarqan-zada lashon ki

panjon mein tar-e-kafan

shola dahan

basti ki bastiyan jhulsati hui

shahr pahunchin to khule dar pae

chaDh gain siDhiyon par khaT khaT khaT

badan hone lage paT

le liya danton mein shiryanon ko

wempaer ki tarah

zindagi kaun si manzil pe ruki hai aa kar

aage chalti bhi nahin

rah badalti bhi nahin

masala ye hai ki ab is mein pahal kaun kare

aasman dur

zamin chur

kahan jae koi

kash aise mein chala aae koi

dil-e-ashufta ko bahlae koi batlae koi

kis tarah phuTti hai KHushk shajar mein konpal