safar

gulābī havā aur niilī udāsī

ye kin jangaloñ kā safar hai

har ik samt kāñToñ bharī rahguzar hai

kahāñ kho ga.e haiñ gajak ke vo Thele

vo jāḌoñ kī rāteñ divālī ke mele

vo Topī vo baste

vo būḌhe muhāfiz vo kīchaḌ ke raste

vo barsātī naale vo mad.hosh bachche

vo kurtoñ kī jeboñ meñ amrūd kachche

vo pannī ke chashme vo miTTī ke bartan

vo bosīda kaḌiyoñ meñ chiḌiyoñ ke maskan

magar ab ye be-ma.anī be-rang manzar

ki phūloñ ke dāman meñ nokīle patthar

hayāt-e-musalsal ye kaisā safar hai

har ik samt kāñToñ bharī rahguzar hai

gulabi hawa aur nili udasi

ye kin jangalon ka safar hai

har ek samt kanTon bhari rahguzar hai

kahan kho gae hain gajak ke wo Thele

wo jaDon ki raaten diwali ke mele

wo Topi wo baste

wo buDhe muhafiz wo kichaD ke raste

wo barsati nale wo madhosh bachche

wo kurton ki jebon mein amrud kachche

wo panni ke chashme wo miTTi ke bartan

wo bosida kaDiyon mein chiDiyon ke maskan

magar ab ye be-mani be-rang manzar

ki phulon ke daman mein nokile patthar

hayat-e-musalsal ye kaisa safar hai

har ek samt kanTon bhari rahguzar hai