safar hai shart

vo kaun the

sahāb the kitāb the

mire har ik savāl kā

javāb the

ki ḳhvāb the

vo kaun the

sitāre the

ki āsmāñ se raushnī liye hue

zamīñ pe aa ga.e the

mere vāste

vo kaun the

vo ham-qalam vo ham-zabāñ

vo ham-yaqīñ vo ham-gumāñ

vo ham-ḳhayāl o ham-bayāñ

vo yuuñ mile

ki jaise hāfize se yaad

jaise tishna miTTiyoñ se bārisheñ

ki jaise shaam ko parind

ghoñsloñ se jā mileñ

ki jaise reg-zār ko

amaañ mile hayāt kī

ki jaise merī zaat ko

azaañ milī ho zaat kī

vo yuuñ mile

to ai zamīn-o-āsmāñ ke nuur

mere mudda.ā

maiñ ḳhvāb dekhtā huuñ

DhūñDhtā bhī huuñ bashārateñ

unheñ bhī

ḳhvāb dekhne

nazar mile

yaqīn tarāshne gumāñ se bhāgne

hunar mile safar mile

vo zulm ho ki ḳhauf ho

vo zaḳhm ho ki choT ho

azaab yā itaab ho

inheñ bachā.e rakh

tū ai mire ḳhudā

maiñ jab milūñ to yuuñ milūñ

vo jab mileñ to yuuñ mileñ

ki jaise sub.h shaam se

koī ḳhud apne naam se

ki jaise dhuup chhāñv se

ġharīb-e-shahr gaañv se

ki jaise lab duāoñ se

vo yuuñ mileñ

maiñ yuuñ milūñ

mire ḳhudā

hai ye duā

yahī duā

wo kaun the

sahab the kitab the

mere har ek sawal ka

jawab the

ki KHwab the

wo kaun the

sitare the

ki aasman se raushni liye hue

zamin pe aa gae the

mere waste

wo kaun the

wo ham-qalam wo ham-zaban

wo ham-yaqin wo ham-guman

wo ham-KHayal o ham-bayan

wo yun mile

ki jaise hafize se yaad

jaise tishna miTTiyon se barishen

ki jaise sham ko parind

ghonslon se ja milen

ki jaise reg-zar ko

aman mile hayat ki

ki jaise meri zat ko

azan mili ho zat ki

wo yun mile

to ai zamin-o-asman ke nur

mere muddaa

main KHwab dekhta hun

DhunDhta bhi hun bashaaraten

unhen bhi

KHwab dekhne

nazar mile

yaqin tarashne guman se bhagne

hunar mile safar mile

wo zulm ho ki KHauf ho

wo zaKHm ho ki choT ho

azab ya itab ho

inhen bachae rakh

tu ai mere KHuda

main jab milun to yun milun

wo jab milen to yun milen

ki jaise subh sham se

koi KHud apne nam se

ki jaise dhup chhanw se

gharib-e-shahr ganw se

ki jaise lab duaon se

wo yun milen

main yun milun

mere KHuda

hai ye dua

yahi dua