safar la safar

vaqt kī zanjīr to kaT nahīñ saktī magar

khol ghaḌī do ghaḌī

qufl dar-e-zāt kā

ā.īna-e-zabt ko sañg-e-tamanna se toḌ

aur ḳhushī se bahā dil meñ rukā sail-e-dard

soch zarā der ko

gosht ke malbūs meñ piñjra haiñ ye pisliyāñ

jis ke ajab sehr meñ

qaid tirī ruuh kā tā.er-e-ḳhush-rañg hai

aañkh uThā kar to dekh

baazū kushāda kiye vo shajar-e-shash-jihat

kitne zamānoñ se hai sirf tirā muntazir

tā.er-e-ḳhush-rañg kī hamrahī-e-shauq meñ

pinjre samet uḌ zarā

hairat o imkān kī vādi-e-nā-muḳhtatim

lamhā-e-lā kī taraf

waqt ki zanjir to kaT nahin sakti magar

khol ghaDi do ghaDi

qufl dar-e-zat ka

aaina-e-zabt ko sang-e-tamanna se toD

aur KHushi se baha dil mein ruka sail-e-dard

soch zara der ko

gosht ke malbus mein pinjra hain ye pisliyan

jis ke ajab sehr mein

qaid teri ruh ka taer-e-KHush-rang hai

aankh uTha kar to dekh

bazu kushada kiye wo shajar-e-shash-jihat

kitne zamanon se hai sirf tera muntazir

taer-e-KHush-rang ki hamrahi-e-shauq mein

pinjre samet uD zara

hairat o imkan ki wadi-e-na-muKHtatim

lamha-e-la ki taraf