safar mudam safar

zamāne ke koh-e-girāñ kī surañgoñ meñ

jaltī huī mish.aleñ le ke

shaam o sahar DhūñDhtā huuñ

ki koī kiran koī rauzan koī mauj-e-bā-e-tāza

jo mil jaa.e maiñ māvarā-e-nazar kī jhalak pā sakūñ

is bhayānak añdhere meñ ghuTte hue jī ko bahlā sakūñ

maiñ jab pahlī baar in surañgoñ meñ dāḳhil huā thā

mujhe kyā ḳhabar thī yahāñ se mafar kī koī raah mumkin nahīñ

har daqīqa mujhe aur uljhā.egā

sīna-koh kī pech-dar-pech rāhoñ meñ

har pal kī parchhā.īñ tārīkiyoñ meñ izāfa karegī

mujhe kyā ḳhabar thī ki har aarzū mujh ko maqsūd se dūr-tar kar sakegī

magar mere dil meñ ye kaisī ḳhalish hai

ki har paspā.ī nau-ba-nau

mujh ko sa.ī-e-musalsal pe uksā rahī hai

surañgoñ kī vahshat nazar ke sharāroñ ko bhaḌkā rahī hai

mujhe justujū aage le jā rahī hai

zamane ke koh-e-giran ki surangon mein

jalti hui mishalen le ke

sham o sahar DhunDhta hun

ki koi kiran koi rauzan koi mauj-e-ba-e-taza

jo mil jae main mawara-e-nazar ki jhalak pa sakun

is bhayanak andhere mein ghuTte hue ji ko bahla sakun

main jab pahli bar in surangon mein daKHil hua tha

mujhe kya KHabar thi yahan se mafar ki koi rah mumkin nahin

har daqiqa mujhe aur uljhaega

sina-koh ki pech-dar-pech rahon mein

har pal ki parchhain tarikiyon mein izafa karegi

mujhe kya KHabar thi ki har aarzu mujh ko maqsud se dur-tar kar sakegi

magar mere dil mein ye kaisi KHalish hai

ki har paspai nau-ba-nau

mujh ko sai-e-musalsal pe uksa rahi hai

surangon ki wahshat nazar ke shararon ko bhaDka rahi hai

mujhe justuju aage le ja rahi hai