safar nadiya ke pani ko wadiat hai

samundar sar jhukā.e bā nahīñ phailā.e hue

chup chaap baiThā hai

abhī kuchh der hī pahle talātum ḳhez maujeñ thiiñ

zamāna us kī Thokar par

samundar sar jhukā.e bā nahīñ phailā.e hue

chup-chāp baiThā hai

thakā-māñdā kisī haare khilāḌī kī tarah

lekin achānak hī kisī mānūs ḳhushbū ne

use chauñkā diyā hai

sāmne ma.asūm nadiyā

saañs roke dam-ba-ḳhud hairāñ

samundar kī udāsī dekhtī hai

mirī omā chalī aao

purānī riit sadiyoñ kī

nadī sāgar se miltī hai

sadā miltī rahegī

mirī azmat mirī vus.at

ki jis par naaz thā mujh ko

vo bas ik iltibās-e-vaqt thā

ab to mire paanī meñ gad-lāhaT hai

mire zā.iqe meñ khāre-pan kī

kaaT hai aisī

ki sairābī kisī bhī tishna-lab kī ho nahīñ saktī

faqat tū hī to pākīza

tire bahte hue paanī meñ vo tāsīr hai

jo saat qulzum kī kasāfat ko miTā Daale

mirī omā zamāna jhuuT hai

lekin to sachchā.ī

ye rishte aañkh kā dhokā

magar tū chashm-e-bīnā aur bīnā.ī

mahā-sāgar

tujh to yaad hai sachche zamānoñ se

mirā vo gungunātā rāsta

sīdhā tumhārī or aatā thā

magar tū kis qadar maġhrūr thā

terī ra.ūnat ne

faqat ik naañ ke buute par

mire alhaḌ bahāv ko vahīñ par rok Daalā thā

maiñ nadiyā thī

safar nadiyā ke paanī kī vadī.at hai

mujhe bahnā thā har sūrat kisī bhī taur chalnā thā

mudavvar ghāTiyoñ dilbar zamīnoñ aur maidānoñ ne

fayyāzī se mujh ko rāsta baḳhshā

mahā-sāgar

mujhe ab lauT jaanā hai

hasīñ sūraj kī kirnoñ se

milan kar ke abhī bādal banānā hai

mujhe chaTyal zamīnoñ garm maidānoñ ko

bhūrī ghāTiyoñ ko

saat rañgī peñg kā

ehsān lauTānā hai

bin jal ke jo dhartī hai

vahāñ sabz bichhānā hai

samundar sar jhukae ba nahin phailae hue

chup chap baiTha hai

abhi kuchh der hi pahle talatum KHez maujen thin

zamana us ki Thokar par

samundar sar jhukae ba nahin phailae hue

chup-chap baiTha hai

thaka-manda kisi haare khilaDi ki tarah

lekin achanak hi kisi manus KHushbu ne

use chaunka diya hai

samne masum nadiya

sans roke dam-ba-KHud hairan

samundar ki udasi dekhti hai

meri oma chali aao

purani rit sadiyon ki

nadi sagar se milti hai

sada milti rahegi

meri azmat meri wusat

ki jis par naz tha mujh ko

wo bas ek iltibas-e-waqt tha

ab to mere pani mein gad-lahaT hai

mere zaiqe mein khaare-pan ki

kaT hai aisi

ki sairabi kisi bhi tishna-lab ki ho nahin sakti

faqat tu hi to pakiza

tere bahte hue pani mein wo tasir hai

jo sat qulzum ki kasafat ko miTa Dale

meri oma zamana jhuT hai

lekin to sachchai

ye rishte aankh ka dhoka

magar tu chashm-e-bina aur binai

maha-sagar

tujh to yaad hai sachche zamanon se

mera wo gungunata rasta

sidha tumhaari or aata tha

magar tu kis qadar maghrur tha

teri raunat ne

faqat ek nan ke bute par

mere alhaD bahaw ko wahin par rok Dala tha

main nadiya thi

safar nadiya ke pani ki wadiat hai

mujhe bahna tha har surat kisi bhi taur chalna tha

mudawwar ghaTiyon dilbar zaminon aur maidanon ne

fayyazi se mujh ko rasta baKHsha

maha-sagar

mujhe ab lauT jaana hai

hasin suraj ki kirnon se

milan kar ke abhi baadal banana hai

mujhe chaTyal zaminon garm maidanon ko

bhuri ghaTiyon ko

sat rangi peng ka

ehsan lauTana hai

bin jal ke jo dharti hai

wahan sabz bichhana hai